హైదరాబాద్‌ : ప్రముఖ సీనియర్‌ నటుడు చంద్రమోహన్‌ (82) శనివారం ఉదయం కన్నుమూశారు. హైదరాబాద్‌లోని అపోలో ఆస్పత్రిలో చికిత్స పొందుతూ ఈరోజు తుదిశ్వాస విడిచారు. కొంత కాలంగా చంద్రమోహన్‌ అనారోగ్య సమస్యలతో బాధ పడుతున్నారు. కొద్దిరోజులుగా వెంటిలేటర్‌ పైన చికిత్స అందించారు. చంద్రమోహన్‌కు భార్య జలంధర, ఇద్దరు కుమార్తెలు ఉన్నారు.
చంద్రమోహన్‌ మరణవార్తతో తెలుగు చిత్రసీమలో విషాదఛాయలు అలుముకున్నాయి. ఆయన మృతి పట్ల పలువురు సినీ ప్రముఖులు సంతాపం వ్యక్తం చేస్తున్నారు. హైదరాబాద్‌లో సోమవారం చంద్రమోహన్‌ అంత్యక్రియలను నిర్వహించనున్నట్లు కుటుంబ సభ్యులు తెలిపారు. చంద్రమోహన్‌ మరణం పట్ల సినీ ప్రముఖులు సంతాపం ప్రకటించారు. ఆయన ఇంటికి ప్రముఖులు తరలివెళుతున్నారు.
కృష్ణా జిల్లా పమిడిముక్కలలో 1943 మే 23న జన్మించిన చంద్రమోహన్‌ అసలు పేరు మల్లంపల్లి చంద్రశేఖర్‌ రావు. బాపట్ల వ్యవసాయ కళాశాలలో చంద్రమోహన్‌ డిగ్రీ పూర్తి చేశారు. 1966లో రంగులరాట్నం చిత్రంతో చంద్రమోహన్‌ సినీ ప్రస్థానం ఆరంభమైంది. పలు తమిళ సినిమాల్లోనూ నటించారు. తన నటనకు గానూ ఫిలింఫేర్‌, నంది అవార్డులు అందుకున్నారు. 'పదహారేళ్ల వయసు', 'సిరి సిరి మువ్వ' సినిమాల్లో ఆయన నటనకు ఉత్తమ నటుడిగా ఫిలింఫేర్‌ అవార్డులు దక్కాయి. సహనాయకుడిగా, నాయకుడుగా, హాస్యనటునిగా, క్యారెక్టర్‌ యాక్టర్‌గా ఎన్నో వైవిద్యమైన పాత్రలు పోషించారు. కొత్త హీరోయన్‌లకు లక్కీ హీరోగా చంద్రమోహన్‌ను పేర్కొంటారు. సిరిసిరిమువ్వలో జయప్రద, పదహారేళ్ళ వయసులో శ్రీదేవి తమ నటజీవితం ప్రారంభంలో చంద్రమోహన్‌తో నటించి, తరువాత ఉన్నత స్థాయికి చేరుకున్నారు.
1987లో 'చందమామ రావే' సినిమాకు ఉత్తమ హాస్యనటుడిగా నంది అవార్డు, 2005లో 'అతనొక్కడే' సినిమాకు ఉత్తమ సహాయ నటుడిగా నంది అవార్డును చంద్రమోహన్‌ అందుకున్నారు. చివరగా 2017లో 'ఆక్సిజన్‌' సినిమాలో కనిపించారు. దర్శకుడు కె. విశ్వనాథ్‌కు చంద్రమోహన్‌ సమీప బంధువు. కథానాయకుడిగా 175 పైగా, మొత్తం 932 సినిమాల్లో చంద్రమోహన్‌ నటించారు. చంద్రమోహన్‌ నటించిన కొన్ని చిత్రాలు సుఖ దు:ఖాలు, పదహారేళ్ళ వయసు, సిరిసిరిమువ్వ, సీతామాలక్ష్మి మొదలైనవి హిట్‌ కొట్టాయి.
