- నెదర్లాండ్స్‌ చేతిలో 38 పరుగుల తేడాతో దక్షిణాఫ్రికా ఓటమి
- వన్డే ప్రపంచకప్‌లో మరో సంచలనం
ధర్మశాల : ఐసిసి వన్డే ప్రపంచకప్‌లో మరో సంచలనం నమోదైంది. ఆస్ట్రేలియా, శ్రీలంకలపై గెలిచిన ఉత్సాహంలో ఉన్న సఫారీ జట్టుకు పసికూన నెదర్లాండ్స్‌ చేతిలో అనూహ్యంగా ఓటమిపాలైంది. వర్షం కారణంగా 43ఓవర్లకు జరిగిన ఈ మ్యాచ్‌లో తొలిగా బ్యాటింగ్‌కు దిగిన నెదర్లాండ్స్‌ జట్టు 8వికెట్ల నష్టానికి 245పరుగులు చేయగా.. ఛేదనలో దక్షిణాఫ్రికా జట్టు 207పరుగులకే ఆలౌటైంది. దీంతో నెదర్లాండ్స్‌ జట్టు 38పరుగుల తేడాతో గెలిచి సంచలనానికి తెరలేపింది. వర్షం కారణంగా ఆలస్యంగా ప్రారంభమైన ఈ పోరులో దక్షిణాఫ్రికా బౌలర్ల దెబ్బకు డచ్‌ టాపార్డర్‌ కూలినా.. లోయరార్డర్‌లో కెప్టెన్‌ స్కాట్‌ ఎడ్వర్డ్స్‌(78నాటౌట్‌; 69బంతుల్లో 10ఫోర్లు, సిక్సర్‌) బాధ్యతాయుత ఇన్నింగ్స్‌ ఆడాడు. తెలుగు కుర్రాడు తేజ నిడమానూరు 20 పరుగులతో ఫర్వాలేదనిపించాడు. భారత సంతతికి చెందిన మరో ఆటగాడు ఆర్యన్‌ దత్‌ చివర్లో దూకుడుగా ఆడాడు. ఆర్యన్‌ దత్‌ 9 బంతుల్లో 3 సిక్సర్లు బాది 23 పరుగులతో అజేయంగా నిలిచాడు. గతంలో దక్షిణాఫ్రికాకు ప్రాతినిధ్యం వహించి, ప్రస్తుతం నెదర్లాండ్స్‌ తరఫున ఆడుతున్న వాన్‌ డెర్‌ మెర్వ్‌ 19 బంతుల్లో 3 ఫోర్లు, సిక్స్‌ సహా 29 పరుగులతో రాణించాడు. దక్షిణాఫ్రికా బౌలర్లలో ఎన్గిడి, యాన్సెన్‌, రబాడాకు రెండేసి, గెరాల్డ్‌ కోట్జీ, కేశవ్‌ మహరాజ్‌కు ఒక్కో వికెట్‌ దక్కాయి. ఛేదనలో దక్షిణాఫ్రికా జట్టు 89పరుగులకే ఐదు వికెట్లు కోల్పోయి పీకల్లోతు కష్టాల్లో పడింది. ఆ దశలో డేవిడ్‌ మిల్లర్‌(43), మహరాజ్‌(40నాటౌట్‌) రాణించారు. ఓ దశలో సఫారీ జట్టు 166పరుగులకే 9వికెట్లు కోల్పోయి భారీ ఓటమి అంచున నిలిచినా.. మహరాజ్‌ రాణించడంతో 200కు పైగా పరుగులు చేసింది. బీక్‌కు మూడు, మీకెర్మన్‌, మెర్వ్‌, లీడేకు రెండేసి వికెట్లు దక్కాయి. దీంతో నెదర్లాండ్స్‌ జట్టు వన్డే ప్రపంచకప్‌ చరిత్రలో మూడో విజయాన్ని నమోదు చేసుకుంది. 2003లో నమీబియాపై 64పరుగుల తేడాతో, 2007లో స్కాట్లాండ్‌పై 8వికెట్ల తేడాతో నెగ్గిన నెదర్లాండ్స్‌.. తాజాగా దక్షిణాఫ్రికాపై 38పరుగుల తేడాతో విజయాన్ని నమోదు చేసుకుంది. ప్లేయర్‌ ఆఫ్‌ ది మ్యాచ్‌ ఎడ్వర్డ్‌కు లభించింది.
వన్డే ప్రపంచకప్‌లో నేడు..
న్యూజిలాండ్‌ × ఆఫ్ఘనిస్తాన్‌
(వేదిక: చెన్నై; మ.2.00గం||లకు)
స్కోర్‌బోర్డు...
నెదర్లాండ్స్‌ ఇన్నింగ్స్‌: విక్రమ్‌జిత్‌ (సి)క్లాసెన్‌ (బి)రబడా 2, మ్యాక్స్‌ ఒడోడ్‌ (సి)డికాక్‌ (బి)జెన్సన్‌ 18, అకెర్మన్‌ (బి)కొట్‌జీ 13, లీడె (ఎల్‌బి)రబడా 2, ఎంగెబ్రెత్‌ (సి)జెన్సన్‌ (బి)ఎన్గిడి 19, తేజ నిడమానూరు (ఎల్‌బి)జెన్సన్‌ 20, ఎడ్వర్డ్స్‌ (నాటౌట్‌) 78, బెక్‌ (స్టంప్‌)డికాక్‌ (బి)మహరాజ్‌ 10, మెర్వ్‌ (సి)డికాక్‌ (బి)ఎన్గిడి 29, ఆర్యన్‌ డట్‌ (నాటౌట్‌) 23, అదనం 31. (43ఓవర్లలో 8వికెట్ల నష్టానికి) 245పరుగులు. వికెట్ల పతనం: 1/22, 2/24, 3/40, 4/50, 5/82, 6/112, 7/140, 8/204 బౌలింగ్‌: ఎన్గిడి 9-1-57-2, జెన్సన్‌ 8-1-27-2, రబడా 9-1-56-2, క్రొట్‌జీ 8-0-57-1, మహరాజ్‌ 9-0-38-1.
దక్షిణాప్రికా ఇన్నింగ్స్‌: బవుమా (బి)మెర్వ్‌ 16, డికాక్‌ (సి)ఎడ్వర్డ్‌ (బి)అకెర్మన్‌ 20, డుస్సెన్‌ (సి)దట్‌ (బి)మెర్వ్‌ 4, మార్‌క్రమ్‌ (బి)మీకెరన్‌ 1, క్లాసెన్‌ (సి)విక్రమ్‌జిత్‌ సింగ్‌ (బి)బీక్‌ 28, డేవిడ్‌ మిల్లర్‌ (బి)బీక్‌ 43, జెన్సన్‌ (బి)మీకెర్మన్‌ 9, కొరెట్జీ (సి)ఎడ్వర్డ్‌ (బి)లీడే 22, మహరాజ్‌ (సి)ఎడ్వర్డ్స్‌ (బి)బీక్‌ 40, రబడా (సి)ఎంగెల్బెర్త్‌ (బి)లీడే 9, ఎన్గిడి (నాటౌట్‌) 7, అదనం 8 (42.5ఓవర్లలో) 207పరుగులకు ఆలౌట్‌. వికెట్ల పతనం: 1/36, 2/39, 3/42, 4/44, 5/89, 6/109, 7/145, 8/147, 9/166, 10/207 బౌలింగ్‌: డట్‌ 5-1-19-0, బీక్‌ 8.5-0-60-3, అకెర్మన్‌ 3-0-16-1, మీకెరన్‌ 9-0-40-2, మెర్వ్‌ 9-0-34-2, లీడే 8-0-36-2.
