నిద్ర కనికరిస్తే
స్వప్నం సాక్షాత్కరిస్తుంది
ఇల కాదని తెలిసినా
అది కరిగేవరకూ
అదే నిక్కమనుకొని
అందులో జీవించాల్సిందే
నీ మాట నీకే వినిపించకున్నా
ఎవరికీ అర్థం కానట్టు
నీ కలలో నీకు తెలిసినా
అది నిజమన్న ఊహలో ఉంటావు
జీవితాన కూడా అదే భ్రమలో
నీ పలుకులు అందరూ
ఇష్టపడుతున్నారన్న ఊహతో
నీ ఆశల పల్లకిని నీతోపాటు
అందరూ మోస్తారనుకున్న
నీ అమాయకత్వానికీ
నీ భ్రమలే సాక్ష్యం
ఏమరుపాటున నమ్మిన
ఎందరి నైజాలో బయటపడి
నీ సూత్రాలు సూత్రీకరణలు
తప్పులుగా బయటపడ్డప్పుడు
కల ఊహ నిజం విడివిడిగా
అగుపడి అదేమిటని చూస్తే
అది నేనేనంటుంది జీవితం !
- జంధ్యాల రఘుబాబు
98497 53298
