మండే గుండెల్లో
మాయని గాయాలెన్నో ?
కడలి అలల కల్లోలంలో
తీరం చేరని బతుకు నావలెన్నో ?
శిథిలమైన జీవితాల్లో
పదిలమైన జ్ఞాపకాలెన్నో ?
చలించే కాలంలో
ఫలించని జీవితాలెన్నో ?
పొడుస్తున్న ఉదయాలలో
విచ్చుకోని హృదయాలెన్నో ?
ఆశల చీకటిలో
అందరాని వెలుగు పూలెన్నో ?
నేతలు రాసిన రాతల్లో
చిక్కుకున్న తలరాతలెన్నో ?
కనులు మూసిన రేయికి
తెలవారని బతుకులెన్నో ?
నిస్పృహల నిశీధిలో
నైరాశ్యమొందే దు:ఖితులెందరో ?
పొత్తిళ్ళు కూర్చిన ఆనందంలో
ఒత్తిళ్ళు మిగిల్చిన విషాదాలెన్నో ?
నిష్కపట చెమట చుక్కలు రాల్చిన
నిరాశల నులివెచ్చని కన్నీళ్ళెన్నో ?
శిశిరం ముసిరిన జీవిత తరువులకు
వసంతం విరియని తనువులెన్నో ?
ప్రశ్న నుండే ఉద్భవించిన ప్రగతి
ప్రశ్నై మిగిలిన జీవితాలకేల ఈ గతి?
- వెంకట్‌ అడ్డాల,
సెల్‌ : 9666181948
