అమరావతి : విమానంలో ఇబ్బందిపెట్టిన తోటి ప్రయాణీకుడి చెంపలను హీరోయిన్‌ శ్రీసుధ ఛెళ్లుమనిపించారు. టాలీవుడ్‌ ప్రముఖ నటి శ్రీసుధ భీమిరెడ్డికి విమాన ప్రయాణంలో చేదు అనుభవం ఎదురైంది.
అర్జున్‌ రెడ్డి సినిమాతో బాగా ఫేమస్‌ అయిన టాలీవుడ్‌ ప్రముఖ నటి శ్రీసుధ భీమిరెడ్డి ఇన్‌స్టాగ్రామ్‌ పోస్ట్‌ ద్వారా తనకు విమానంలో ఎదురైన చేదు అనుభవాన్ని తెలిపారు. తాజాగా... విమానంలో ప్రయాణించిన ఆమెను ఓ ఆకతాయి ఇబ్బందులకు గురిచేశాడు. వెనక సీట్లో కూర్చొని అదేపనిగా కాళ్లను ముందుకు చాస్తూ ... శ్రీ సుధను టచ్‌ చేసేందుకు ట్రై చేశాడు. దీనిపై ఆమె చాలాసార్లు అతడిని హెచ్చరించినప్పటికీ ఆ వ్యక్తి పట్టించుకోలేదు. మళ్లీ అలాంటి వెకిలీచేష్టలే చేయడంతో శ్రీసుధ విమాన సిబ్బందికి ఫిర్యాదు చేశారు. సిబ్బంది చెప్పినప్పటికీ ఆ ప్రయాణికుడి తీరు మారలేదు. దీంతో సహనం కోల్పోయిన శ్రీసుధ ఆకతాయి చెంపలు పగలగొట్టింది. ఈ విషయాన్ని శ్రీసుధనే ఇన్‌స్టాగ్రామ్‌ పోస్ట్‌ ద్వారా వివరించారు. విమానంలో తోటి ప్రయాణికుడు తనను ఏ రకంగా ఇబ్బందిపెడుతున్నాడో తెలియజేసేలా ఓ ఫోటోను షేర్‌ చేశారు.
' దీనిపై ఎలా రియాక్ట్‌ అవ్వాలి? ఫ్లైట్‌ స్టాఫ్‌కి రెండుసార్లు చెప్పి చూశాను. అయినా అతడి బుద్ధి మారలేదు. అందుకే ఒక్క కిక్‌ ఇచ్చాను. అతని బొక్కలు విరిగితే నాకు మాత్రం ఎటువంటి సంబంధం లేదు ' అని శ్రీసుధ పోస్టులో రాశారు. ప్రస్తుతం ఈ పోస్ట్‌ సోషల్‌ మీడియాలో వైరల్‌గా మారింది. చాలామంది నెటిజన్లు నటి చేసిన పనిని మెచ్చుకుంటే... మరికొందరు మాత్రం అలా కొట్డడం సరికాదంటూ కామెంట్లు పెడుతున్నారు. ఉన్నత అధికారులకు ఫిర్యాదు చేస్తే సరిపోయేదంటూ సూచించారు.
నెటిజన్ల కామెంట్లపై కూడా శ్రీసుధ స్పందించారు. ' నాకు ఆ మాత్రం తెలియదా ? రెండుసార్లు చెప్పి చూశాను, కానీ ఫలితం లేదు ' అని సమాధానం ఇచ్చారు.
