రష్యా : రష్యా దక్షిణ ప్రాంతంలోని డాగేస్తాన్‌లోని ఓ గ్యాస్‌ స్టేషన్‌లో మంగళవారం తెల్లవారుజామున భారీ పేలుడు సంభవించింది. ఈ అగ్ని ప్రమాదంలో 12 మంది మృతి చెందారు. దాదాపు 60 మందికి పైగా గాయపడ్డారు. గాయపడిన వారిలో 13 మంది చిన్నారులు ఉన్నట్లు డాగేస్తానీ ఆరోగ్య మంత్రిత్వ శాఖ అధికార వర్గాలు ఈరోజు తెల్లవారుజామున విడుదల చేసిన ఓ వీడియో ప్రకటనలో తెలిపారు. ఈ ఘటనను రష్యా అధికారులు ఈరోజు ధ్రువీకరించారు. రష్యా కాలమానం ప్రకారం... సోమవారం అర్ధరాత్రి ఈ ఘటన చోటుచేసుకుంది. ఈ అగ్ని ప్రమాదంలో పలు కార్లు కాలి బూడిదయ్యాయి. ఓ భారీ అంతస్థుల భవనం దగ్ధమైనట్లు సమాచారం తెలుస్తోంది.
కాస్పియన్‌ సముద్రం ఒడ్డున ఉన్న మఖచ్కల నగరంలో హైవే పక్కన ఉన్న ఓ కార్ల సర్వీసింగ్‌ సెంటర్‌లో ముందుగా మంటలు చెలరేగాయి. ఆ మంటలు పక్కనే ఉన్న గ్యాస్‌ స్టేషన్‌కు వ్యాపించాయి. దీంతో పెద్ద ఎత్తున పేలుడు సంభవించింది. మంటల తీవ్రత ఎక్కువగా ఉండడంతో పరిసర ప్రాంతాలకు కూడా వ్యాపించాయి. అగ్నిమాపక సిబ్బంది 260 ఫైరింజన్లతో సహాయక చర్యలు చేపట్టారు. మూడున్నర గంటల కంటే ఎక్కువ సమయం శ్రమించాక మంటలు అదుపులోకి వచ్చాయి.
