ప్రభుత్వానికి నచ్చిన వారినే ఎంపిక చేయకూడదు
సెలెక్టివ్‌గా నియామకాలు జరిగితే సీనియారిటీ క్రమానికి విఘాతం కలుగుతుంది
ప్రభుత్వం సమస్యను పరిష్కరించకుంటే... ఉత్తర్వుల జారీ వెనుకాడబోం
సుప్రీంకోర్టు ధర్మాసనం
ప్రజాశక్తి-న్యూఢిల్లీ బ్యూరో : న్యాయమూర్తుల నియామకానికి సంబంధించిన కొలీజియం ప్రతిపాదనల పేర్లను ఆమోదించే సమయంలో కేంద్ర ప్రభుత్వం అనుసరిస్తున్న 'పిక్‌ అండ్‌ సెలెక్ట్‌' విధానంపై సుప్రీంకోర్టు మంగళవారం ఆందోళన వ్యక్తం చేసింది. న్యాయమూర్తుల కోసం సిఫార్సు చేసిన వారి సీనియారిటీకి ఈ విధానం భంగం కలిగించిందని అత్యున్నత న్యాయస్థానం పేర్కొంది. 'ఈ పిక్‌ అండ్‌ సెలెక్ట్‌ ఆపివేయాలి. ఇది ఆఫ్‌ హ్యాండ్‌ రిమార్క్‌ కాదు' అని కోర్టు పేర్కొంది. సుప్రీంకోర్టు, హైకోర్టు న్యాయమూర్తుల నియామకంలో కొలీజియం సిఫార్సులను కేంద్ర ప్రభుత్వం ఆమోదించడంలో జరుగుతున్న జాప్యాన్ని ప్రశ్నిస్తూ బెంగళూరు న్యాయవాదుల సంఘం దాఖలు చేసిన పిటిషన్‌ను మంగళవారం సుప్రీంకోర్టు న్యాయమూర్తులు సంజరు కిషన్‌ కౌల్‌, సుధాన్షు ధులియాతో కూడిన ధర్మాసనం విచారణ జరిపింది. ప్రభుత్వం సమస్యను పరిష్కరించకుంటే ఈ అంశంపై ఉత్తర్వులు జారీ చేసేందుకు వెనుకాడబోమని న్యాయమూర్తులు తెలిపారు.
'కొలీజియం సిఫార్సుల ఆమోదించడంలో పురోగతి లేకపోవడంపై మేము అటార్నీ జనరల్‌ వద్ద ఆందోళన వ్యక్తం చేశాం. పెండింగ్‌లో ఉండటం చాలా ఆందోళన కలిగించే అంశం. కొలీజియం సిఫార్సుల్లో ప్రభుత్వం ఎంపిక చేస్తున్నందున ఇది చాలా ఆందోళన కలిగిస్తుంది. దీనిపై ప్రభుత్వం చర్యలు తీసుకుంటుందని అటార్నీ జనరల్‌ తెలిపారు.
గత పరిస్థితి రాకూడదని మేము ఆశిస్తున్నాము. కొలీజియం లేదా ఈ కోర్టు ఆమోదయోగ్యం నిర్ణయాన్ని తీసుకుంటుంది' అని ధర్మాసనం పేర్కొంది. హైకోర్టుల నియామకాల కోసం సుప్రీంకోర్టు కొలీజియం న్యాయమూర్తుల పేర్లను ప్రతిపాదించినప్పుడు, ప్రభుత్వం, ప్రతిపాదిత పేర్ల నుండి ఎంపిక చేసుకునే బదులు, కొలీజియం చేసిన సిఫార్సుల క్రమంలో న్యాయమూర్తులను క్లియర్‌ చేయాలని కూడా ధర్మాసనం సూచించింది.
పంజాబ్‌, హర్యానా హైకోర్టులను ఉదాహరణను ఉదహరించిన ధర్మాసనం 'సుప్రీంకోర్టు కొలీజియం పంజాబ్‌, హర్యానా హైకోర్టులకు ఐదుగురు న్యాయవాదులను పదోన్నతి కల్పించాలని సిఫార్సు చేసింది. సీరియల్‌ నెంబర్‌ 1, 2లో ఉంచబడిన పేర్లను విస్మరించి, కేంద్రం కేవలం ముగ్గురి పేర్లను మాత్రమే క్లియర్‌ చేసింది' అని ధర్మాసనం పేర్కొంది. సెలెక్టివ్‌గా నియామకాలు జరిగితే సీనియారిటీ క్రమానికి విఘాతం కలుగుతుందని, తద్వారా యువ న్యాయవాదులు న్యాయమూర్తులుగా బాధ్యతలు చేపట్టేందుకు అనువుగా ఉండదని ధర్మాసనం పేర్కొంది.
పెండింగ్‌లో ఉన్న పేర్లపై సుప్రీంకోర్టు స్పందిస్తూ కొలీజియం ప్రతిపాదించిన 14 పేర్లు ఇప్పటికీ ప్రభుత్వం వద్ద పెండింగ్‌లో ఉన్నాయని, కొలీజియం పునరుద్ఘాటించినప్పటికీ వాటిలో ఐదు పెండింగ్‌లో ఉన్నాయని ధర్మాసనం పేర్కొంది. 'ఈ బదిలీలు తప్పక జరగాలి. లేకుంటే అది వ్యవస్థలో విపరీతమైన క్రమరాహిత్యాన్ని సృష్టిస్తుంది' అని జస్టిస్‌ ఎస్‌కె కౌల్‌ అన్నారు.
సెంటర్‌ ఫర్‌ పబ్లిక్‌ ఇంట్రెస్ట్‌ లిటిగేషన్‌ తరఫున న్యాయవాది ప్రశాంత్‌ భూషణ్‌ వాదనలు వినిపిస్తూ.. అటార్నీ జనరల్‌ ఇచ్చిన హామీలపై చర్యలు తీసుకోకుండా కోర్టు కొరడా ఝుళిపించాల్సిన సమయం ఆసన్నమైందన్నారు. ఈ కేసు తదుపరి విచారణను నవంబరు 20కు వాయిదా వేసింది.
