అరచేతిలో ప్రపంచం

చిత్రాల నుండి
విచిత్రాల వరకు
చిత్రంగా సాగే సాధనం
ప్రాంతాల నుండి
ప్రపంచపు నలుమూలల్ని
దృశ్యమాలికగా తీర్చి
కనుల ముందు పెట్టే నైజం
సోషల్‌ మీడియా
రంగుల రాట్నమై
భూగోళానికి రంగులద్దే
నిత్య వినూత్న విహంగం
నిజాలను నిర్భయంగా
కనుపాపలకు తాకించే
విశేషాల సమాహారం
నిగూఢమైన సంఘటనల్ని
నిస్సందేహంగా విడమరుస్తూ
సారవంతమైన తెరపై
దృశ్య కావ్యమై పండిస్తూ
ప్రతిబింబం చూపే అద్దం
సుఖ దు:ఖం సమపాళ్ళుగా
వినోదపు క్రీడా రంగాన్ని
రాజకీయ సమకాలీన అంశాన్ని
తన చిట్టి తెరపై
అప్పటికప్పుడు చూపించే
అలుపెరుగని చైతన్యం
ప్రమాదపు ఘంటికలను
ఇంద్రజాలపు కథనాలను
చలన చిత్ర మాలిక సొబగును
యావత్తు జగతి అణువణువును
విశదపరిచే మేటి ఆయుధం
మనిషి మనిషిని తన వైపుగా
అల్లుకుపోయే విశిష్ట రూపం
సర్వ సమస్తాన్ని
ఆకట్టుకునే ఆశక్తికది నిదర్శనం
మంచికైనా చెడుకైనా
ఒకే త్రాసుపై కదిలే వాస్తవం
అణువంతైనా
అంతు చిక్కనంతైనా
హల్‌ చెల్‌ చేస్తూనే
గుట్టు గోడలు బద్దలు కొట్టే
సోషల్‌ మీడియా సూత్రం
అరచేతిలో ప్రపంచం

- నరెద్దుల రాజారెడ్డి
9866500305