విష్ణు మంచు డ్రీమ్‌ ప్రాజెక్ట్‌ కన్నప్ప షూటింగ్‌ ప్రస్తుతం శరవేగంగా జరుగుతోంది. న్యూజిలాండ్‌లోని అందమైన లకేషన్లలో ఈ మూవీ చిత్రీకరణ చేస్తున్నారు. దాదాపుగా 80 శాతం షూటింగ్‌ న్యూజిలాండ్‌లోనే జరగనుందని తెలుస్తోంది. న్యూజిలాండ్‌లోని ప్రకృతి దృశ్యాలను, అత్యాధునిక సినిమాటిక్‌ టెక్నాలజీని ఉపయోగించుకుని ఈ సినిమాని ప్రేక్షకులపై శాశ్వత ప్రభావాన్ని చూపే దృశ్యకావ్యంగా రూపొందించాలని మంచు విష్ణు భావిస్తున్నారు. 'న్యూజిలాండ్‌లో ప్రారంభించిన ఈ మూవీని అత్యుత్తమ రీతిలో చిత్రీకరించేందుకు ఎంతో అంకితభావంతో పని చేస్తున్నాం. అగ్రశ్రేణి ప్రతిభావంతులు, నటీనటులు, అత్యాధునిక సాంకేతికతతో, రాబోతున్న తరాల వారికి గుర్తుండిపోయేలా ఓ కళాఖండంగా ఈ కన్నప్పను తెరకెక్కిస్తున్నామని' మంచు విష్ణు అన్నారు. ముఖేష్‌ కుమార్‌ సింగ్‌ దర్శకత్వం వహిస్తున్న ఈ 'కన్నప్ప' సినిమాలో విష్ణు మంచు టైటిల్‌ రోల్‌లో నటిస్తున్నారు. మోహన్‌లాల్‌, శివ రాజ్‌కుమార్‌, ప్రభాస్‌, శరత్‌ కుమార్‌ వంటి అగ్రనటులు ఈ చిత్రంలో ముఖ్య పాత్రలు పోషిస్తున్నారు.
