ఎస్‌.ఎల్‌.ఎస్‌. క్రియేషన్స్‌ పతాకంపై కంచర్ల అచ్యుతరావు నిర్మిస్తున్న చిత్రం 'ఉపేంద్ర గాడి అడ్డా'. కంచర్ల ఉపేంద్ర, సావిత్రి కృష్ణ జంటగా నటిస్తున్నారు. ఆర్యన్‌ సుభాన్‌ ఎస్‌కే దర్శకత్వంలో తెరకెక్కుతోంది. తాజాగా ఈ చిత్రం టీజర్‌ని సంగీత దర్శకురాలు ఎం.ఎం.శ్రీలేఖ విడుదల చేశారు. 'మొదట్నుంచి నాకు సినిమా పిచ్చి ఉండేది. విడుదలైన అన్ని సినిమాలు చూస్తూండేవాడ్ని. అయితే ఇతర వ్యాపార రంగాలలో బిజీ కావడంతో ఇంతకాలం సినిమా రంగంలోనికి ప్రవేశించలేదు. హీరో కావాలన్న మా అబ్బాయి ఉపేంద్ర ఆసక్తిని గమనించి, అతనిని హీరోగా పరిచయం చేస్తూ, ఐదు సినిమాలను మొదలు పెట్టాం. అవన్నీ వివిధ దశలలో ఉన్నాయి. ఐదవ సినిమాగా మొదలు పెట్టిన ఈ సినిమా చాలా వేగంగా పూర్తయి, మొదటి సినిమాగా విడుదలకు సిద్ధమైంది. పూర్తి వినోదం, మాస్‌ అంశాలతో ఆద్యంతం ప్రేక్షకులను సమ్మోహన పరిచేవిధంగా రూపొందింది' అని నిర్మాత తెలిపారు.
ఈ నెల 29న మా అబ్బాయి పుట్టినరోజున ఈ చిత్రం ప్రీ రిలీజ్‌ వేడుకను హైదరాబాద్‌ లో భారీ ఎత్తున నిర్వహించబోతున్నాం. అదేరోజున ఈ చిత్రం ట్రైలర్‌ ను కూడా విడుదల చేస్తాం. నవంబర్‌ లో ఈ సినిమాను విడుదల చేయడంతో పాటు మిగతా మేము తీస్తున్న సినిమాలను ప్రతీ నెలా ఒక సినిమా చొప్పున విడుదల చేస్తాం' అని చెప్పారు.
'సోషల్‌ మీడియా నేటి సమాజాన్ని ఎంతగా ప్రభావితం చేస్తుందో తెలియంది కాదు. దానివల్ల చెడు మార్గాన్ని ఎంచుకోకుండా, మంచిని పెంపొందింపజేస్తే, సమాజం మరింత వికాసవంతం అవుతుందన్న సందేశాత్మక పాయింట్‌ ను కూడా ఇందులో ఆవిష్కరించాం'అని దర్శకుడు ఆర్యన్‌ సుభాన్‌ అన్నారు. ఈ కార్యక్రమంలో హీరో కంచర్ల ఉపేంద్ర, హీరోయిన్‌ సావిత్రి కృష్ణ తదితరులు పాల్గన్నారు.
