అరగంటకు మూడు నిమిషాలు చాలు.. ఇదేమిటి అని తలబద్దలు కొట్టుకోకండి.. ప్రతి అరగంటకు ఒకసారి మూడు నిమిషాలు నడవండి. తద్వారా శరీరంలోని రక్తంలో చక్కెర స్థాయిల్లో మెరుగుదల ఉంటుంది. హా ! యూకే డయాబెటిస్‌ ఛారిటీ కాన్ఫరెన్స్‌లో ఒక అధ్యయనం నిరూపించిన విషయమిది. టైప్‌-1 డయాబెటిస్‌ ఉన్న 32 మంది వ్యక్తులపై పరిశోధన జరిపారు.
ఏడు గంటల సమయంలో రెగ్యులర్‌ వాకింగ్‌ బ్రేక్స్‌ అంటే ప్రతి అరగంటకొకసారి మూడు నిమిషాలు మాత్రం నడవటం ద్వారా వారిలో బ్లడ్‌ షుగర్‌ స్థాయిలు తగ్గాయి.
'యాక్టివిటీ స్నాక్స్‌' అనే ఈ విధానాన్ని ఆచరణాత్మకంగా, ఖర్చు లేకుండా మంచి మార్పుల్ని అందించగలదని డయాబెటిస్‌ యూకే తెలిపింది.
బ్రిటన్‌లో నాలుగు లక్షల మంది టైప్‌ 1 డయాబెటిస్‌తో ఇబ్బంది పడుతున్నారు. క్లోమంలో ఇన్సులిన్‌ ఉత్పత్తి చేసే కణాలపై రోగ నిరోధకవ్యవస్థ దాడి చేసినప్పుడు ఈ పరిస్థితి తలెత్తుతుందని అధ్యయనంలో తేలింది. ఎందుకంటే అప్పుడు క్లోమం తగినంత ఇన్సులిన్‌ను ఉత్పత్తి చేయలేదు. దీనివల్ల బ్లడ్‌ షుగర్‌ లెవెల్స్‌ పెరుగుతుంటాయి. దీంతో బాధితులు క్రమం తప్పకుండా ఇన్సులిన్‌ను తీసుకోవాలి.
నడుస్తూ ఫోన్‌ మాట్లాడితే సరి..
దీర్ఘకాలం బ్లడ్‌ షుగర్‌ ఉన్నవారిలో మూత్రపిండాల వైఫల్యం, కంటి సమస్యలు, గుండెపోటులాంటి తీవ్రమైన ఆరోగ్య సమస్యలు వస్తాయి.
టైప్‌1 డయాబెటిస్‌తో బాధపడేవారు నిత్యం బ్లడ్‌ షుగర్‌ లెవల్స్‌ను నియంత్రించుకోవాలని డయాబెటిస్‌ యూకే రీసెర్చ్‌ డైరెక్టర్‌ డాక్టర్‌ ఎలిజబెత్‌ రాబర్ట్సన్‌ చెప్పారు. ఎలిజబెత్‌ రాబర్ట్సన్‌ ఈ అధ్యయనానికి నిధులు అందించారు.
'ఇది అద్భుతమైన, ప్రోత్సహించదగ్గ యాక్టివిటీ. పెద్దగా కష్టం లేకుండా, సులభంగా ఆచరణాత్మకమైన మార్పుల్ని ఈ అధ్యయనం సూచిస్తుంది. కాసేపు నడుస్తూ ఫోన్‌ మాట్లాడినా మూడు నిమిషాలు పెద్ద కష్టమేమీ కాదు. అలాగే ఇలా బ్రేక్‌ తీసుకోవడానికి మధ్య మధ్యలో టైమర్‌ పెట్టుకోవడం ఉత్తమం. అంతిమంగా ఎక్కువ సేపు కదలకుండా కూర్చోకుండా చూసుకోవాలి. ఫలితంగా బ్లడ్‌ షుగర్‌ స్థాయుల్ని తేలిగ్గా నియంత్రించుకోవచ్చు' అంటున్నారు ఎలిజబెత్‌.
ఈ విధానంలో దీర్ఘకాలిక ప్రయోజనాల్ని అర్థం చేసుకునేందుకు మరింత అధ్యయనం చేపట్టాలని అనుకుంటున్నట్లు ఆమె తెలిపారు.
తక్కువ యాక్టివిటీతోనే ఇంత అద్భుతమైన ఫలితాల్ని చూసి తాను చాలా ఆశ్చర్యపోయానని యూనివర్సిటీ ఆఫ్‌ సండర్‌ల్యాండ్‌ లీడ్‌ రీసర్చర్‌ డాక్టర్‌ మాథ్యూ క్యాంప్‌బెల్‌ చెప్పారు.
'టైప్‌ 1 డయాబెటిస్‌తో ఇబ్బందిపడే కొందరికి 'యాక్టివిటీ స్నాకింగ్‌' అనేది శారీరక వ్యాయామానికి అత్యంత కీలకమైనది. ఇతరులకు శరీరంలో బ్లడ్‌ గ్లూకోజ్‌ లెవెల్స్‌ను నియంత్రించుకునేందుకు ఇదొక సులభమైన ప్రక్రియ కావొచ్చు' అన్నారు.
శారీరక వ్యాయామం ఎక్కువగా చేసినప్పుడు బ్లడ్‌లో గ్లూకోజ్‌ ప్రమాదకర స్థాయిల్లో పడిపోయే ముప్పు ఉంది. కానీ ఈ విధానంలో అలాంటిది కనిపించదని పరిశోధకులు చెప్పారు.
ఈ ప్రయోగం ప్రాథమిక దశలో టైప్‌ 1 డయాబెటిస్‌ ఉన్న 32 మంది వ్యక్తులపై రెండు సెషన్లపాటు అధ్యయనం చేపట్టారు.
ఒక సెషన్‌లో వారు ఏడు గంటల పాటు కూర్చునే ఉన్నారు. మరో సెషన్‌లో ఏడు గంటల్లో ప్రతి అర్ధగంటకు ఒకసారి మూడు నిమిషాల సేపు నడిచారు.
ప్రతి సెషన్‌ ప్రారంభమైనప్పటి నుంచి 48 గంటల పాటు వారి బ్లడ్‌ షుగర్‌ లెవల్స్‌ను చెక్‌ చేస్తూనే ఉన్నారు.
ఈ ఏడు గంటల్లో వారు నిత్యం తీసుకునే ఆహారాన్నే తీసుకున్నారు. ఇన్సులిన్‌ ట్రీట్మెంట్‌లో ఎలాంటి మార్పూ చేయలేదు.
లేవకుండా అలాగే కూర్చున్న వారిలో సగటు బ్లడ్‌ షుగర్‌ లెవల్స్‌ 8.2 గా ఉన్నాయి. నడవడం కోసం తరచూ బ్రేక్స్‌ తీసుకొన్నవారిలో సగటు స్థాయులు (6.9) తగ్గాయి.
దీర్ఘకాలం పాటు దీనిపై అధ్యయనాలు చేపడితే ఈ విధానం ద్వారా కలిగే ప్రయోజనాలను పూర్తిగా అర్థం చేసుకోవచ్చని డాక్టర్‌ క్యాంప్‌బెల్‌ చెప్పారు.
రోజులో ఎక్కువ సమయం పాటు నడవడం, కదలడం వంటి సులభతరమైన విధానాలను ప్రోత్సహించడం ద్వారా పెద్ద మొత్తంలో ప్రజలకు మేలు కలుగుతుందన్నారు.
డయాబెటిస్‌ అంటే ఏమిటి ?
డయాబెటిస్‌ అనేది దీర్ఘకాలిక అనారోగ్యం. ఇది మనిషి శరీరంలో బ్లడ్‌ షుగర్‌ స్థాయులు అత్యధికంగా పెరిగేందుకు కారణమవుతుంది.
రెండు రకాల డయాబెటిస్‌:
టైప్‌ 1: ఇన్సులిన్‌ను ఉత్పత్తి చేసే కణాలపై శరీర రోగనిరోధక వ్యవస్థ అటాక్‌ చేసి, ఈ కణాలను నాశనం చేస్తుంది.
టైప్‌ 2: ఈ సమస్య ఉంటే శరీరంలో సరిపడా ఇన్సులిన్‌ ఉత్పత్తి కాదు. లేదా ఇన్సులిన్‌కు శరీర కణాలు స్పందించవు.
టైప్‌ 1 డయాబెటిస్‌తో పోలిస్తే టైప్‌ 2 డయాబెటిస్‌ ఎక్కువ సాధారణంగా ఉంటోంది.
ఆధారం: ఎన్‌హెచ్‌ఎస్‌, డయాబెటిస్‌ యూకే
