రేపు ఆత్మకూరులో '' తెలుగుదేశం పిలుస్తోంది రా కదలిరా '' కార్యక్రమం : మాజీ మంత్రి పరిటాల సునీత పిలుపు

ప్రజాశక్తి-ఆత్మకూరు (అనంతపురం) : రాయలసీమలో అర్ధాంతరంగా ఆగిన ప్రాజెక్టులను పరిశీలన చేయడానికి టిడిపి అధినేత చంద్రబాబు రానుండగా ... ఆయనకు స్వాగతం పలకడానికి '' తెలుగుదేశం పిలుస్తోంది రా కదలిరా '' కార్యక్రమాన్ని ఆత్మకూరు వేదికగా రేపు ఏర్పాటు చేయనున్నట్లు మాజీ మంత్రి పరిటాల సునీత, పరిటాల శ్రీరామ్‌ ప్రకటించారు.

బుధవారం మాజీ మంత్రి పరిటాల సునీత మాట్లాడుతూ ... రాయలసీమలో టిడిపి అధికారంలో ఉన్నప్పుడు చేపట్టిన సాగునీటి ప్రాజెక్టులను వైసిపి ప్రభుత్వం వచ్చిన తర్వాత రాప్తాడు ఎమ్మెల్యే నిధులు తెచ్చి కాలువ నిర్మాణం చేపట్టలేక అర్ధాంతరంగా ఆగిపోయిన ప్రాజెక్టులను పరిశీలించడానికి రాప్తాడు నియోజకవర్గం ఆత్మకూరు సమీపాన సింగన్నగుట్ట వద్ద జీడిపల్లి - పేరూరు అప్పర్‌ పెన్నర్‌ పరిటాల రవీంద్ర సాగునీటికాలువ నిర్మాణ పనులను టిడిపి జాతీయ అధ్యక్షుడు చంద్రబాబు పరిశీలించడానికి రేపు ఆత్మకూరు మండలానికి విచ్చేస్తున్నారని తెలిపారు. ఆత్మకూరు మండల వ్యాప్తంగా ఉన్న తెలుగుదేశం పార్టీ సీనియర్‌ నాయకులు, పార్టీ అనుబంధ సంఘాల నాయకులు, మహిళలు, కుటుంబ సాధికారిక సారధులు, కార్యకర్తలు, రైతులు పెద్ద ఎత్తున పాల్గని సభను జయప్రదం చేయాలని పరిటాల సునీత పిలుపునిచ్చారు.