మా వాడి నవ్వులను
ఎవరు ఎత్తుకెళ్ల లేదు
మా వాళ్ళ మానాలను
ఎవరూ చెరచలేదు
సారీ కంప్లైంట్‌ ఇవ్వలేను
మా బతుకు లెప్పుడూ
అడవిలో అర్ధాంతరంగా
ఏ గొడ్డలి వేటుకో
నేలకూలే చెట్ల మాదిరే
మీ చట్టాలెప్పుడూ
ద్రోహులను, దోపిడీదారులను కాపాడెతీరే
సారీ కంప్లైంట్‌ ఇవ్వలేను
మీరు మనుషులు కాదని తెలియక
మీ నీళ్ల తావుకాడకొచ్చిన
మా బుజ్జి మేకది తప్పే
మీ పులుల వేట ఇంకా ఆగలేదని
తెలియదు వాడికి
సారీ కంప్లైంట్‌ ఇవ్వలేను
మేక తోలు కప్పుకొని తిరుగుతున్న
తోడేళ్ల మధ్య బతుకుతున్నామని
తెలుసుకోలేని మా వాళ్లది తప్పే
చెరచినోల్లకి, చంపినోల్లకి
రామ రాజ్యంలో సన్మానాలు జరుగుతాయని
తెలియదు వాళ్లకి
చెరచబడితే, చంపబడితే
అగ్గిల దూకి పరీక్షల
నిలబడాలే కానీ
కోర్టు మెట్ల కాడ కాదని తెలుసుకోలేకపోవడం
మా వాళ్ల తప్పే
శిక్షలేసుట్ల తేడాలుంటాయని తెలిపిన
మనువు వారసుల ఏలుబడిలో ఉన్నామని
తెలియదు వాళ్లకి
సారీ కంప్లైంట్‌ ఇవ్వలేను
వాడి నవ్వులను వాడే దాసుకున్నాడు
వాళ్ల మానాలనూ
వాళ్లే చెరుపుకున్నారు
వారికి వారే కాలి బూడిదై
రాతిరాకాశపు నలుపై
మీ కుట్రల పై
నిత్యం నిరసనగా
నిలబడి ఉన్నారు
సారీ కంప్లైంట్‌ ఇవ్వలేను
సారీ కంప్లైంట్‌ ఇవ్వలేను... ఇవ్వలేను
ఇంద్ర కుమార్‌ మేఘవాల్‌, బిల్కిస్‌ బానో సంఘటనలకు నిరసనగా....
వి.దిలీప్‌
84640 30808
