ఒప్పుకోలు

నీవైనా కావచ్చు నావైనా కావచ్చు
ఎదురుచూపులు పడిగాపులు
తెచ్చిన చద్దిని తీసి కాకులకన్నా వేద్దామా
ఎలాగూ వాసనకొట్టిపోయుంటుంది
తినటానికి చోటులేకే కదా.. ఇసుక రాలదు
అన్నీ మానవ సమూహాలు దేహాలు మూతులు
పిడచగట్టుకుపోయిన నాలుకలు గొంతులు
రక్తపుచారల లోతుకళ్ళు
శుచీ శుభ్రం మడీ ఇవన్నీ హాస్యాస్పదంగా
చాదస్తంగా అనిపిస్తున్నాయి కదా
ఏమీ అనవేమి
నేలను చూస్తూ
ఉండిపోయావ్‌ బిర్రబిగుసుకుని
ఇక వచ్చేది మన స్టేషనే
కొన్ని నామరహిత ముఖాలు
పరిచయమవుతాయి అక్కడ
విప్లవ జెండాలతో మనల్ని సూటిగా
అడుగుతాయి గుండెలు ఇవ్వమని
బెదురుతూ ఎక్కడ చస్తామో
ఎదుర్కొనడం మరణాన్ని జయించడమే
భయం దిగులు మనిషిని
పట్టి పీడిస్తున్న వైరస్‌
ఇది ఏ దేశం నుంచో దిగుమతి కాలే
అన్ని దేశాల పైన్నుంచి దూసుకెళ్ళిన శకటమిది
అన్ని సంకెళ్ళూ విప్పుకున్నామనుకున్నాం
మన లోపల పేరి సిలుము పట్టినవి ఉన్నవి
వికృతంగా పరమ అసహ్యంగా
సుఖానికి మరిగే ఇలా తయారయ్యాయి
ఇప్పుడు కావల్సింది నిఖార్సైన ఒప్పుకోలు
మనం మనతోనే కొన్ని ఒప్పుకోవల్సినవి
మార్చుకోవల్సినవి.. మార్పే వినూత్న విప్లవం!
అది జీవం తెచ్చేదిగా ప్రాణం పోసేదిగా
నిలబెట్టేదిగా భలే ధైర్యంగా ఉంటది
ఉరుము ముందు వచ్చే దానిలా
విద్యుదావేశ క్షిపణిలా...

రఘు వగ్గు
96032 45215