అద్భుతమైన కథతో సాగిన నరకాసు సినిమా సూపర్‌ హిట్‌ అవుతుందనే నమ్మకం తనకుందని హీరో రక్షిత్‌ అట్లూరి చెప్పారు. 'పలాస' ఫేమ్‌ రక్షిత్‌ అట్లూరి హీరోగా నటించిన సినిమా 'నరకాసుర'. అపర్ణ జనార్థన్‌, సంకీర్తన విపిన్‌ హీరోయిన్లు. సుముఖ క్రియేషన్స్‌, ఐడియల్‌ ఫిలిం మేకర్స్‌ బ్యానర్స్‌లో డాక్టర్‌ అజ్జా శ్రీనివాస్‌ నిర్మించారు. సెబాస్టియన్‌ నోవా అకోస్టా జూనియర్‌ దర్శకత్వం వహించారు. ఈ నెల 3న తెలుగుతో పాటు హిందీ, తమిళ్‌, మళయాల, కన్నడ భాషల్లో విడుదల కానుంది. ఈ సందర్భంగా సినిమా హైలైట్స్‌, తన కెరీర్‌ విశేషాలను రక్షిత్‌ అట్లూరి మీడియాకు వివరించారు. 'నరకాసుర'' మూవీ ఏపీ, తమిళనాడు సరిహద్దుల్లోని ఓ కాఫీ ఎస్టేట్‌ నేపథ్యంలో సాగుతుంది. ఈ సినిమాలో నేను లారీ డ్రైవర్‌ శివ అనే క్యారెక్టర్‌లో నటించాను. నాజర్‌ కాఫీ ఎస్టేట్‌ సూపర్‌ వైజర్‌ క్యారెక్టర్‌ చేస్తున్నారు. నేను ఆయన దగ్గర పనిచేసే డ్రైవర్‌ కమ్‌ పెప్పర్‌ హార్వెస్టర్‌గా కనిపిస్తాను. నా గత సినిమా పలాసలో దళితులకు సంబంధించిన సమస్యలు చూపించినట్లే 'నరకాసుర'' సినిమాలో హిజ్రాలకు సంబంధించిన పాయింట్‌ ఒకటి తీసుకున్నాం. కథలో ఇదొక అంశం మాత్రమే. సినిమా అంతా కమర్షియల్‌ ఎలిమెంట్స్‌తో ఉంటుంది. ఈ ట్రాన్స్‌ జెండర్స్‌ అంశం కథలో ఒక సంఘర్షణకు కారణంగా నిలుస్తుంది' అని వివరించారు.
