నా కవనాలు

నా కవనాలు లోకానికి కిరణాలు
బానిస వర్గానికి ఆశాజ్యోతులు
కార్మిక లోకపు ఆర్తనాదాలు
యువశక్తికి ప్రగతిమార్గాలు

నా కవనాలు దగాపడ్డ జనాల
ఆత్మ ఘోషలు
చేయూతనిచ్చి ముందుకి నడిపే
పెళ పెళమని గర్జించే
మేఘపు ఉరుములు

నా కవనాలు సామాన్యుడి చెమటచుక్క అవే సువాసనలు
అవే సామాన్యుడి ఆకలి కేకలు
కసితో రగిలే వాడి బతుకు పోరాటాలు
వాడికి స్ఫూర్తిని ఇచ్చే బతుకు పాఠాలు

నా కవనాలు ఆ సముద్రుడి ఆగ్రహావేశాలు
కెరటాల సమూహాలు
తుపాను కలయికలు
ఆ సాగర సంభాషణలు
సాగరగర్భ రహస్యాలు

నా కవనాలు
అరిషడ్వర్గాల ప్రస్తావనలు
వాటి నుంచి
బయటపడడానికి మార్గాలు

నా కవనాలు
నిను మేల్కొలిపే వీచికలు
నీ జీవితానికి లక్ష్యాన్ని చూపే మార్గదర్శకాలు

నా కవనాలు
మలయ మారుతాలు
ప్రణయ గీతాలు
ప్రేమ పాఠాలు

నా కవనాలు ప్రకృతి ఒడిలో
నిదురోయే జోలపాటలు
హృదయాంతరాలలోని
అగాథాల కావ్య రూపాలు

ఆర్‌ నవజీవన్‌ రెడ్డి
97423 77332