కథానాయకుడు ఎన్టీఆర్‌ 'వార్‌ 2'లో భాగమవుతున్నట్లు ఇప్పటికే స్పష్టత వచ్చింది. ఆయన, హృతిక్‌ రోషన్‌ ప్రధాన పాత్రల్లో నటిస్తున్న ఈ చిత్రాన్ని అయాన్‌ ముఖర్జీ తెరకెక్కించనున్నారు. ప్రస్తుతం పూర్వ నిర్మాణ పనుల్లో ఉన్న ఈ సినిమా డిసెంబరు నెలాఖరు నుంచి రెగ్యులర్‌ చిత్రీకరణ జరుపుకోనుంది. ఈ చిత్రం కోసం ఎన్టీఆర్‌ జనవరి నుంచి డేట్లు కేటాయించారని సమాచారం. ప్రస్తుతం ఆయన కొరటాల శివ దర్శకత్వంలో 'దేవర' చేస్తున్న సంగతి తెలిసిందే. ఇది రెండు భాగాలుగా విడుదల కానుండగా.. తొలి భాగం చిత్రీకరణ డిసెంబరు చివరి నాటికి పూర్తి కానున్నట్లు ప్రచారం జరుగుతోంది. అందుకే తారక్‌ జనవరి నుంచి 'వార్‌ 2' సెట్లోకి అడుగు పెట్టేందుకు సన్నాహాలు చేసుకుంటున్నట్లు తెలుస్తోంది. ఈ సినిమా 2025లో ప్రేక్షకుల ముందుకు రానుందని సమాచారం.
