కోలీవుడ్‌ హీరో కార్తి తన అభిమానుల కోసం భూరి విరాళాన్ని మంగళవారం ప్రకటించారు. ఆయన నటించిన 25వ చిత్రం 'జపాన్‌' ఈనెల 10న విడుదల కానుంది. టీజర్‌ విడుదలైన రోజు నుంచి కార్తి అభిమానులు 25 రోజుల పాటు ప్రతిరోజూ వెయ్యిమందికి అన్నదానం చేస్తున్నారు. 'జపాన్‌' నిర్మాత ఎస్‌.ఆర్‌ ప్రభు, దర్శకుడు రాజు మురుగన్‌ ఈ కార్యక్రమాన్ని ప్రారంభించిన విషయం తెలిసిందే. అభిమానుల్లో మరింత ఉత్సాహాన్ని నింపేందుకుగాను, జపాన్‌ సినిమా ఎక్కువ రోజులు గుర్తిండేలాగా కార్తీ అన్నదాన కార్యక్రమానికి రూ.1.25 కోట్లు విరాళంగా మంగళవారం ప్రకటించారు. దీంతో అభిమానులు సంతోషం వ్యక్తంచేస్తూ టపాసులు పేల్చారు.
