హైదరాబాద్‌ : ఏదైనా ఆరోగ్య సమస్యతో తార్నాకలోని ఆర్టీసీ ఆసుపత్రిలో చికిత్సకోసం వచ్చిన వారికి తిరిగి ఇంటికి వెళ్లేవారికి టిఎస్‌ఆర్‌టిసి ఉచిత ప్రయాణ సౌకర్యాన్ని కల్పించింది. వజ్రోత్సవాల సందర్భంగా ప్రవేశ పెట్టిన పథకాన్ని ఇక ముందు కూడా కొనసాగిస్తుంది. ఆసుపత్రిలో వైద్యులను సంప్రదించాక తిరిగి ఇంటికి వెళ్తున్నప్పుడు 2 గంటల వరకూ ఉచిత ప్రయాణ సదుపాయం ఉంటుంది. వైద్యులు రాసిన మందుల చిట్టీపైనే సమయాన్ని వేస్తారు. ఆ చిట్టీని బస్సులోని కండక్టర్‌కు చూపిస్తే ఉచితంగా ప్రయాణించవచ్చు. గ్రేటర్‌ హైదరాబాద్‌ పరిధిలో ఎక్కడివరకైనా ఇలా ఉచితంగా వెళ్లొచ్చు. అలాగే దూరప్రాంతాల నుంచి నగరానికి టీఎస్‌ఆర్టీసీ బస్సుల్లో వచ్చే ప్రయాణికులకు కూడా ఉచిత బస్సు ప్రయాణం వరిస్తుంది. ఎంజీబీఎస్‌తోపాటు నగరంలో ఎక్కడ దిగినా తర్వాత 2 గంటలు సిటీ బస్సులో ఉచితంగా ప్రయాణించొచ్చని రంగారెడ్డి ఆర్టీసీ రీజియన్‌ మేనేజర్‌ సామ్యుల్‌ చెప్పారు.
