అంతా సేమ్‌ టు సేమ్‌
చూసే కనులకు, చూడని మనసుకు
కానీ ఏదో మర్మం కప్పుకుంటుంది
చుక్కల్లోని వెన్నెల
మంచుపువ్వులు కప్పుకున్నట్టు!
అంతా సేమ్‌ టు సేమ్‌
అక్కడ ఇక్కడ పువ్వులే కురుస్తాయి
ఆడ కొమ్మలకు పూలు పూస్తాయి
ఈడ ముళ్ళు మొలుస్తాయి
ఆచోట పన్నీరు పారితే
ఇచ్చట కన్నీరు ప్రవహిస్తుంది
కానీ లోకం దృష్టిలో అంతా సేమ్‌ టు సేమ్‌!
ప్రాణాలు ఉండే దేహలకు మనుషులని పేరు
కానీ బొందులో ప్రాణాలకే విలువ అనుకునేరు
ధనవంతులు, బీదవాళ్లు అనే తేడా ఉంటుంది!
ధనవంతుల ప్రాణాలకు ఒక విలువ ఉంటుంది
అది పోతే పార్థీవ దేహమని
లాంఛనాలతో సత్కారాలుంటాయి!
మరి సామాన్యుడి మరణం
చావు అని.. శవం అని,
ఆరుబయట అగ్గిలో చలికాచుకోమంటాయి !
నింగి, నేల, చెట్టు, చేమ అన్నీ సమానం
అంతా సమానం
ప్రాణం పోసిన దేవుడికే
పాలించే రాజుకు కాదు !
ప్రతి దాని విలువ కొనుక్కునేవాడి స్థితిలో పెట్టి
కొందరికే చెల్లుబడుతున్నాయి.
అది నీ తప్పో. నా తప్పో కాదు
అది అంతే....
యాపిల్‌ పండు మీద ఉన్న వ్యాక్స్‌లా
చూడటానికి ఒకేలా ఉంటాయి
అయినా అందరికీ అన్నీ చెందవు
అవి అక్షరాలైనా, పదవులైన
చివరాఖరికి అమ్మ ప్రేమ అయినా
కొనుక్కునే వాడి జేబుకి చిల్లుపడితే తప్ప
నిన్ను చేరాలంటే
ప్రతి దానికి ఒక లెక్క ఉంటుంది
దానికో విలువ ఉంటుంది
ఆ లెక్కను సరిచేసి చూస్తే
సేమ్‌ టు సేమ్‌
కొండమీద కోతి కూడా కోరి వస్తుంది!!
జ్యోతి మువ్వల
9008083344
