పరిచయం అక్కరలేని పేరు

ఈ ప్రపంచానికి నిన్నెలా పరిచయం చెయ్యాలి
ఉన్నత విద్యావంతుడివనా
కణకణ మండే నిప్పుకణాలను
అక్షరాలకు అద్దే సవ్యసాచివనా
నీ పేరు వింటేనే
ఉద్రేకంతో ఊగిపోయే యువతరానికి
నిన్నెలా పరిచయం చెయ్యాలి

నిద్రిస్తున్న జాతిని
జాగృతం చేసేందుకు
విశ్రమించని పోరాటం సలిపిన
యోధుడివనా
కమ్యూనిజాన్ని నరా నరానా జీర్ణించుకొన్న
సిద్ధాంతకర్తవనా
నిన్నెలా పరిచయం చెయ్యాలి

పోరాటమంటే
ప్రాణాన్ని ఫణంగా పెట్టి పోరాడతావని
స్నేహమంటే
ప్రాణాన్నిసైతం ధారపోస్తావని
నాయకత్వమంటే
ఎలాంటి స్థితిలోనైనా కార్యోన్ముఖుడవై
దివిటీలా నిలవడతావని
పరిచయం చెయ్యనా...?

చుట్ట పొగ రింగులు రింగులుగా
మేఘాలను సృష్టించినట్లు
నీ భావావేశ భుగ భుగలు
విప్లవజ్యోతులను రగిలించింది
అరుణకాంతుల ధగ ధగలు
పేటలు కోటలు కదిలించింది

చరిత్ర గమనం
నాయకుల మరణంతో ఆగిపోదు
చరిత్రగా మారిన వ్యక్తులు
నేలకొరిగితే విప్లవాలు ఆగిపోవు
వారి మరణం శరీరానికే తప్ప
వారందించిన స్ఫూర్తికి కాదు

సామ్రాజ్యవాదం పొడిచిన వెన్నుపోటుతో
నేలకొరిగి వుండవచ్చు...
సామ్రాజ్యవాదానికి
వణుకుపుట్టించింది మాత్రం
నువ్వేనని కొత్తగా చెప్పడానికేముంది
పోరాటంలో నేలకొరిగిన
మా కాలపు పరిపూర్ణ మానవుడా...
పోరాటానికే ఎత్తులు నేర్పిన
గెరిల్లా యోధుడా
చేగువేరుడా...
నిన్నిలాగే... నీకులాగే పరిచయం చేస్తా

జీవితకాలంలో కనీసం ఒక్కసారైనా
పోరాడటానికి
నువ్వు నడిచిన మార్గంలో
నడవడానికి
నీ కలల సాకారంలో
పడుతూ లేస్తూ సాగుతున్నాం...
మెల్లమెల్లగానైనా
అడుగులు వెయ్యాలని కదులుతున్నాం...
అందుకిదే సాక్ష్యం
నేటికీ యువతరం గుండెలపై
నీపేరు రెపరెప లాడుతూనే వుంది
చే అని... చేగువేరా అని...
యువతరం గుండెల్లో నీ పేరు
ముద్రితమయ్యే వుంది
అవును...
పరిచయం అక్కరలేని పేరు నీది

ఈ ప్రపంచం కొత్త చరిత్రను
లిఖిస్తుంది
మెరుగైన సమాజ నిర్మాణానికి పునాదులు
వేస్తుంది
ప్రపంచ యువతకొక ప్రతీక చే
సాహసానికి నమూనా చే
భావితరానికి మార్గదర్శి చే
పరిచయం అక్కరలేని పేరు చే... చేగువేరా

- రాజాబాబు కంచర్ల