సినీ పరిశ్రమలో కొత్త దనాన్ని ప్రేక్షకులు ఆదరిస్తారు. దీంతో హీరోలు, దర్శకులు, నిర్మాతలు ఏదో ఒక కొత్తదనంతో సినిమాలు తీస్తుండటంతో అవి బ్లాక్‌బ్లస్టర్లను అందుకోవటం తెలిసిందే. తాజాగా దక్షిణాది సినిమా పరిశ్రమలో ఇదో ట్రెండ్‌ కొనసాగుతోంది. క్రేజీ కాంబినేషన్‌లో వస్తున్న సినిమాలు సన్షేనల్‌గా మారుతున్నాయి. సాధారణంగా కొన్ని కాంబినేషన్లలో సినిమాలు వస్తున్నాయంటే చాలు ఆసక్తి మామూలుగా ఉండదు. సినిమా ఎలా ఉండబోతుందనే ఉత్సుకత సర్వత్రా కనిపిస్తుంటుంది. తాజాగా తమిళ హీరో సూర్యతో దర్శకురాలు సుధా కొంగర చిత్రం చేస్తుండటం తెలిసిందే. అలాంటి కాంబినేషన్‌లోనే హీరో రవితేజ, దర్శకుడు గోపీచంద్‌ మలినేని సినిమా కూడా హాట్‌ టాపిక్‌గానే మారింది. వీరిద్దరి కాంబినేషన్‌లో వస్తోన్న నాలుగో సినిమాపై సామాజిక మాధ్యమాల్లో స్పందన బాగా వస్తోంది. తమిళ హీరో కమల్‌హాసన్‌తో దేశంలోనే అగ్ర దర్శకుడు మణిరత్నం చిత్రం చేస్తున్న విషయం తెలిసిందే. మూడున్నర దశాబ్ధాల తర్వాత వస్తోన్న వీరి కాంబినేషన్‌పై పాన్‌ ఇండియా స్థాయిలో ఆసక్తి నెలకొంది. 2024లో థియేటర్లలోకి రానున్న ఈ సినిమాలపై సామాజిక మాధ్యమాల్లో వస్తోన్న పోస్టులకు ప్రేక్షకుల నుంచి స్పందన పెరుగుతోంది.
సూర్యాసుధ : 'సూరరై పోట్రు' (తెలుగులో 'ఆకాశం నీ హద్దురా!') వంటి హిట్‌ ఫిల్మ్‌ తర్వాత హీరో సూర్య, దర్శకురాలు సుధా కొంగర కాంబినేషన్‌లో కొత్త సినిమా తెరకెక్కనుంది. సూర్య 43వ సినిమాగా తెరకెక్కనున్న ఈ చిత్రంలో మలయాళ నటుడు దుల్కర్‌ సల్మాన్‌, నటి నజ్రియా ఫాహద్‌, నటుడు విజరు వర్మ కీలక పాత్రల్లో నటించనున్నారు. 2డీ ఎంటర్‌టైన్మెంట్స్‌ పతాకంపై జ్యోతిక, సూర్య, రాజశేఖర్‌, కర్పూర సుందరపాండియన్‌ ఈ సినిమాను నిర్మించనున్నారు. పీరియాడికల్‌ యాక్షన్‌ డ్రామాగా ఈ సినిమా పాన్‌ ఇండియా స్థాయిలో తెరకెక్కనుంది. ఈ చిత్రానికి జీవీ ప్రకాశ్‌ కుమార్‌ స్వరకర్త. అతనికి సంగీత దర్శకుడిగా ఇది నూరవ చిత్రం కావడం విశేషం. ఇదిలా ఉంటే.. 68వ జాతీయ అవార్డులలో ఉత్తమ నటుడు, ఉత్తమ నేపథ్య సంగీతం, ఉత్తమ నటి, ఉత్తమ స్క్రీన్‌ప్లే, ఉత్తమ చిత్రం విభాగాల్లో 'సూరరై పోట్రు' సినిమా అవార్డులు సాధించింది. తాజా చిత్రంతో సూర్య-సుధల కాంబో రిపీట్‌ అవుతోంది. తాజాగా కంగువ, వాడీవాసల్‌ చిత్రాల్లో సూర్య నటిస్తున్న విషయం తెలిసిందే.
రవితేజాగోపీచంద్‌ మలినేని : క్రేజీ కాంబోల్లో రవితేజ -గోపీచంద్‌ మలినేని సినిమాలు కూడా నిలిచాయి. ఈ ఇద్దరి కలయికలో వచ్చిన మూడు సినిమాలు బాక్సాఫీస్‌ వద్ద తమ మార్క్‌ను చూపించాయి. డాన్‌ శీను, బలుపు మంచి సక్సెస్‌ను అందుకున్నాయి. ఇక చాలా కాలంగా సక్సెస్‌ కోసం ఎదురుచూస్తున్న రవిజేతకు క్రాక్‌ సినిమాతో బ్లాక్‌ బస్టర్‌ సెకండ్‌ ఇన్నింగ్స్‌ అందించాడు గోపీచంద్‌ మలినేని. రవితేజ కోసం గోపీచంద్‌ మలినేని మరో సినిమా కథను సిద్ధంచేశారు. ఆర్‌టి 4 జిఎం పేరుతో విడుదల చేసిన పోస్టర్లు తాజాగా ఆకట్టుకుంటున్నాయి. ధమాకా, వాల్తేరు వీరయ్య సినిమాలు విజయాలను సొంతం చేసుకున్న విషయం తెలిసిందే. టైగర్‌ నాగేశ్వరరావు సినిమా అంతగా మెప్పించలేకపోయింది. మలినేని గోపీచంద్‌ సినిమాపై ఇప్పుడు రవితేజ ఆశలు పెంచుకున్నారు.
కమల్‌హాసన్‌ామణిరత్నం : రాజ్‌ కమల్‌ ఫిలింస్‌ ఇంటర్నేషనల్‌, మద్రాస్‌ టాకీస్‌, రెడ్‌ జెయింట్‌ మూవీస్‌ క్రేజీ కాంబినేషన్‌లో కమల్‌ హాసన్‌ 234 చిత్రం 2024లో థియేటర్లోకి రానుంది. ఉలగనాయగన్‌ కమల్‌ హాసన్‌ ప్రధాన పాత్ర పోషిస్తున్న ఈ చిత్రానికి మణిరత్నం దర్శకత్వం వహించనున్నారు. ఈ చిత్రానికి సంగీతం ఏఆర్‌ రెహమాన్‌ అందించనున్నారు. వీరిద్దరి కాంబినేషన్‌లో వచ్చిన నాయగన్‌ కల్ట్‌ క్లాసిక్‌గా నిలిచింది. దాదాపు 35 సంవత్సరాల తర్వాత మరోసారి ఆ మ్యాజిక్‌ రిపీట్‌ కాబోతుంది. ఉలగనాయగన్‌ కమల్‌ హాసన్‌, మణిరత్నం, ఆర్‌. మహేంద్రన్‌, శివ అనంత్‌ ఈ చిత్రాన్ని నిర్మిస్తున్నారు. ఇటీవల జరిగిన ప్రత్యేక కార్యక్రమంలో మణిరత్నం మాట్లాడారు. కమల్‌తో మళ్లీ కలిసి పని చేయడం సంతోషంగా, గౌరవం, ఉత్సాహంగా ఉందని పేర్కొన్నారు. కెహెచ్‌234 పేరుతో సినిమా నిర్మాణానికి నిర్మాతలు సిద్ధమవుతున్నారు.
