స్వర్ణం సాధించిన మౌనికకు అభినందన

• అంతర్జాతీయ టెన్నికాయిట్ పోటీ
• జిల్లా పరిషత్ చైర్మన్ మజ్జి శ్రీనివాసరావు 

ప్రజాశక్తి-విజయనగరం టౌన్ : బుధవారం అంతర్జాతీయ బాలికలు దినోత్సవ సందర్భంగా విజయనగరం జిల్లాలలో బాలికలు అందరికీ  జిల్లా వైఎస్ఆర్ కాంగ్రెస్ పార్టీ అధ్యక్షులు, జిల్లా పరిషత్ చైర్మన్  మజ్జి శ్రీనివాసరావు (చిన్న శ్రీను)  అంతర్జాతీయ బాలికలు దినోత్సవ శుభాకాంక్షలు తెలిపారు. మహిళా సాధికారత ద్వారానే ఆంధ్రప్రదేశ్ అభివృద్ధి సాధ్యమని నమ్మిన వ్యక్తి ముఖ్యమంత్రి జగన్మోహన్ రెడ్డి అని మజ్జి శ్రీనివాసరావు (చిన్న శ్రీను)  అన్నారు. బాలురుతో సమానంగా బాలికలు కూడా అన్ని రంగాల్లో రాణించాలని ఆకాంక్షిస్తూ.. విద్యతో పాటు క్రీడారంగంలో బాలికలను ప్రోత్సహించాలని వారి తల్లిదండ్రులకు సూచించారు. ఈ సందర్భంగా  అండర్-20 విభాగంలో అంతర్జాతీయ స్థాయిలో  జరిగిన టెన్నికాయిడ్ పోటీలకు ఎంపికైన గరివిడి మండలానికి చెందిన రెడ్డి మౌనికకు జిల్లా పరిషత్ నిధుల నుంచి విమాన చార్జీల నిమిత్తం లక్ష రూపాయల ఆర్థిక సాయాన్ని అందించిన నేపథ్యంలో ఆమె స్వర్ణ పతకం సాధించడం చాలా ఆనందకరమని ఈ సందర్భంగా ఆమెకు జెడ్పీ కార్యాలయంలో సత్కరించి, అభినందనలు తెలియజేశారు.