లడ్డూ :
కావాల్సిన పదార్థాలు :
ఉసిరికాయ తురుము - కప్పు, బెల్లం తురుము- కప్పు, డ్రైఫ్రూట్స్‌- రుచికి సరిపడా, పచ్చికోవా- టేబుల్‌ స్పూను, పచ్చికొబ్బరి తురుము- కప్పు, నెయ్యి- టేబుల్‌ స్పూను.
తయారుచేసే విధానం:
- పాన్‌లో నెయ్యి వేసి, కాగాక డ్రైఫ్రూట్స్‌ వేగించి తీయాలి. అందులోనే ఉసిరికాయ తురుము వేసి వేగనివ్వాలి. తర్వాత కొబ్బరి తురుము, పచ్చికోవా వేసి వేగించాలి.
- మరో పాన్‌లో అరకప్పు నీళ్లుపోసి అందులో బెల్లం తురుము వేసి పాకం పట్టాలి. లేతపాకం వచ్చాక ఉసిరి తురుము, కొబ్బరి తురుము మిశ్రమం వేసి, బాగా కలుపుతూ ఉడికించాలి.
- మిశ్రమం దగ్గరగా వచ్చాక వేగించిన డ్రైఫ్రూట్‌ ముక్కలు వేయాలి. తర్వాత స్టవ్‌ ఆఫ్‌ చేసి కాస్త చల్లారాక నెయ్యి రాసుకుంటూ లడ్డుల్లా చుట్టాలి.
రోటి పచ్చడి
కావాల్సిన పదార్థాలు :
కొత్తిమీర-200 గ్రాములు, ఉసిరికాయలు-200 గ్రాములు, పచ్చిమిరపకాయలు-100 గ్రాములు, అల్లం-చిన్నముక్క, ఉప్పు- టీస్పూను.
తయారుచేసే విధానం:
- ముందుగా కొత్తిమీరను శుభ్రంగా కడగాలి.
- ఉసిరికాయల్లోని గింజలు తీసేసి వాటిని చిన్న ముక్కలుగా తరగాలి.
- పచ్చిమిరపకాయలు, అల్లం సన్నగా తరిగి పక్కన పెట్టుకోవాలి.
- తర్వాత అన్నింటినీ ఒకేసారి మిక్సీలో వేసి మెత్తగా రుబ్బుకోవాలి. చివరిలో తాలింపు మీ ఇష్టం. అంతే ఉసిరి రోటిపచ్చడి రెడీ.
సాంబార్‌
కావాల్సిన పదార్థాలు:
ఉసిరికాయలు - 100 గ్రాములు, కందిపప్పు (ఉడికించినవి) - కప్పు, సాంబారు పొడి - రెండు టీస్పూన్లు, పసుపు - చిటికెడు, పచ్చిమిర్చి - రెండు,
కరివేపాకులు - కొన్ని, ఆవాలు - టీస్పూన్‌, ఇంగువ - చిటికెడు, ఉప్పు- తగినంత, నూనె - సరిపడా.
తయారుచేసే విధానం:
- ఉసిరికాయల్ని కడిగి గింజలు తీసి ముక్కలుగా కోసుకోవాలి. పచ్చిమిర్చిని నిలువుగా తరగాలి.
- గిన్నెలో కప్పు నీళ్లుపోసి ఉసిరిముక్కల్ని ఉడికించాలి. బాగా ఉడికిన తర్వాత వాటిని మెత్తగా మెదపాలి. అందులోనే సాంబార్‌పొడి, పసుపు, పచ్చిమిర్చి, ఇంగువ, ఉప్పు వేసి ఉడికించాలి.
- తరువాత ఉడికించిన కందిపప్పు వేసి, తగినన్ని నీళ్లు పోసి, మళ్లీ ఉడికించాలి.
- అన్ని పదార్థాలు బాగా కలిసిపోయిన తరువాత గిన్నెను స్టవ్‌ మీద నుంచి కిందకు దింపాలి.
- పాన్‌లో నూనె తీసుకొని, తాలింపు గింజలు వేయాలి. అందులోనే కరివేపాకునూ వేసుకోవాలి.
- ఆవాలు చిటపటమంటున్నప్పుడు సాంబార్‌లో తాలింపు వేస్తే ఉసిరి సాంబారు రెడీ.
