పేదల సొంతింటి కల సాకారం

• ఎమ్మెల్యే శంబంగి, ఎంపీ బెల్లాన

ప్రజాశక్తి-బొబ్బిలి : నవరత్నాలు-పేదలందరికి ఇల్లు పథకంతో పేదల సొంతింటి కల సాకారం అవుతుందని ఎమ్మెల్యే శంబంగి వెంకట చిన అప్పలనాయుడు, ఎంపీ బెల్లాన చంద్రశేఖర్ అన్నారు. పేదల కోసం పట్టణంలోని ఐటిఐ కాలనీ వద్ద ప్రభుత్వం ఏర్పాటు చేసిన జగనన్న కాలనీలో సామూహిక గృహ ప్రవేశాలు చేశారు. ఈసందర్భంగా శంబంగి మాట్లాడుతూ పేదల సొంతింటి కలను సాకారం చేసేందుకు ప్రభుత్వం నవరత్నాలు-పేదలందరికి ఇల్లు పథకం అమలు చేస్తున్నట్లు చెప్పారు. గత ప్రభుత్వ హయాంలో వార్డుకు, గ్రామానికి ఒకటి,రెండు ఇల్లు మంజూరు చేస్తే వైసీపీ హయాంలో అర్హులందరికీ జగనన్న ఇల్లు మంజూరు చేసినట్లు చెప్పారు. నియోజకవర్గంలో 10,964 ఇల్లు మంజూరు చేస్తే 6415 ఇళ్ల నిర్మాణాలు పూర్తి చేసినట్లు చెప్పారు. బొబ్బిలి నియోజకవర్గం రాజులు 15ఏళ్ల పాలనలో అభివృద్ధికి దూరంగా ఉందన్నారు. వైసీపీ నాలుగున్నరేళ్ల పాలనలో అన్ని రంగాల్లో అభివృద్ధి చేశామన్నారు. జగనన్న కాలనీ, ఇందిరమ్మ కాలనీలో రోడ్లు, కాలువలు, విద్యుత్, తాగునీటి సౌకర్యం ఏర్పాటు చేస్తున్నట్లు చెప్పారు. అన్ని రంగాల్లో సీఎం జగన్మోహన్ రెడ్డి మహిళలకు ప్రాధాన్యత ఇస్తున్నారన్నారు. రైతులకు సాగునీరు అందించడంతో 90శాతం వరినాట్లు పూర్తి అయ్యాయన్నారు. గ్రామాల్లో తాగునీరు సంపూర్ణంగా అందించేందుకు జలజీవన్ మిషన్ పథకంతో ఇంటింటి కుళాయిలు వేస్తున్నామన్నారు. పట్టణంలో ఇంటింటి కుళాయిలు వేసేందుకు సువర్ణముఖి నది నుంచి మున్సిపాలిటీకు ఇంటింటి కుళాయిలు వేసేందుకు మంచినీటి పథకానికి రూ.93.62కోట్లు మంజూరు అయ్యాయన్నారు. ఎంపీ బెల్లాన చంద్రశేఖర్ మాట్లాడుతూ మహిళలు అన్ని రంగాల్లో అభివృద్ధి చెందాలని ఉద్దేశ్యంతో మహిళలు పేరు మీద జగనన్న ఇల్లు మంజూరు చేసినట్లు చెప్పారు. రాష్ట్రంలో 30లక్షల ఇల్లు మంజూరు చేస్తే ఐదు లక్షల ఇల్లు పూర్తి చేసిన ఘనత వైసీపీ ప్రభుత్వానికే దక్కుతుందన్నారు. అవినీతికి తావులేకుండా రాజకీయాలకు అతీతంగా సంక్షేమ పథకాలు అందిస్తున్నట్లు చెప్పారు. ప్రజలకు ఇంటి వద్దకే వైద్యం అందించేందుకు జగనన్న ఆరోగ్య సురక్ష అమలు చేస్తున్నట్లు చెప్పారు. అంగవైకల్యం లేకుండా పిల్లలకు జన్మనిచ్చే విధంగా ప్రభుత్వ ఆసుపత్రిలో టిఫా స్కాన్ సౌకర్యం కల్పించినట్లు చెప్పారు. అవినీతి చేయడం వలనే చంద్రబాబు అరెస్టు అయ్యారన్నారు. జిల్లా కలెక్టర్ ఎస్.నాగలక్ష్మి మాట్లాడుతూ పేదలందరికి నవరత్నాలు-పేదలందరికి ఇల్లు, టిడ్కో ఇల్లు మంజూరు చేసినట్లు చెప్పారు. పేదల సొంతింటి కల సాకారం అవ్వడం ఆనందంగా ఉందన్నారు. జగనన్న కాలనీలో మౌలిక సౌకర్యాలు కల్పిస్తున్నట్లు చెప్పారు. ఉచితంగా విద్యుత్ కనెక్షన్ ప్రభుత్వం ఇస్తుందన్నారు. లబ్ధిదారులు ఇంటి నిర్మాణానికి ముందుకు రావాలని కోరారు. మున్సిపల్ చైర్మన్ సావు వెంకట మురళీకృష్ణ మాట్లాడుతూ రాజకీయాలకు అతీతంగా సంక్షేమ పథకాలు అందిస్తున్నామన్నారు. అర్హులందరికీ జగనన్న ఇల్లు మంజూరు చేశామన్నారు. కార్యక్రమంలో రాజాం ఎమ్మెల్యే కంబాల జోగులు, అసిస్టెంట్ కలెక్టర్, ఆర్డీఓ.పి.శేషశైలజ, హౌసింగ్ పిడి వి.శ్రీనివాస్, మున్సిపల్ కమిషనర్ ఎస్.శ్రీనివాసరావు, జడ్పీటీసీ సభ్యులు, వైసీపీ నాయకులు, అధికారులు పాల్గొన్నారు.