ప్రజాశక్తి-బొబ్బిలి : పైశాచిక ఆనందం కోసం టీడీపీ అధినేత చంద్రబాబును వైసీపీ ప్రభుత్వం అరెస్టు చేసిందని టీడీపీ నియోజకవర్గ ఇంచార్జి బేబినాయన అన్నారు. కోటలో ఆదివారం విలేకరులతో మాట్లాడుతూ అన్యాయంగా అరెస్టు అయిన చంద్రబాబు సతీమణి భువనేశ్వరి, లోకేష్, బ్రాహ్మణి, బాలకృష్ణను మాజీ ఎమ్మెల్యే తెంటు రాజాతో కలిసి సంఘీభావం తెలిపామన్నారు. చంద్రబాబును అన్యాయంగా ఘోరంగా మానవత్వం లేకుండా రాజ్యాంగ, ప్రజాస్వామ్య విలువులకు తూట్లు పొడిచి అరెస్టు చేశారన్నారు. వ్యవస్థలను మేనేజ్ చేసి వ్యవస్థలో పని చేస్తున్న ఉద్యోగులను భయభ్రాంతులకు గురి చేస్తున్నారన్నారు. చంద్రబాబు బరువుపై భిన్న వాదనలు చేస్తున్నారు. చర్మ సంబంధిత వ్యాధితో బాధ పడితే చికిత్స అందించకుండా హేళన చేయడం దుర్మార్గమన్నారు. రాష్ట్రంలో ఏదేశంలో లేని రాజ్యాంగాన్ని, ప్రజాస్వామ్యాన్ని వైసీపీ ప్రభుత్వం అమలు చేస్తుందని విమర్శించారు. పైశాచిక ఆనందం పొందడానికి అరెస్టు చేశారన్నారు. సాక్ష్యాలు లేని కేసుపై అరెస్టు చేయడంతో వైసీపీ తగు మూల్యం చెల్లించుకోక తప్పదన్నారు. చంద్రబాబు కుటుంబ సభ్యులను చూసి భావోద్వేగానికి గురైనట్లు చెప్పారు. కడిగిన ముత్యంలా చంద్రబాబు బయటకు వస్తారన్నారు. జనసేన అధినేత పవన్ కళ్యాణ్ వ్యక్తిగత జీవితంపై విమర్శలు చేయడం సిగ్గు చేటన్నారు. రాజకీయ విమర్శలకు సమాధానం చెప్పే సత్తా లేకనే వ్యక్తిగత విమర్శలు చేస్తున్నారన్నారు. రాజకీయంగా ఎదుర్కోవాలని వైసీపీ నేతలకు సూచించారు.
