నందమూరి బాలకృష్ణ రాకతో టిడిపి కార్యకర్తల్లో ఉత్సాహం
ప్రజాశక్తి- రాజమహేంద్రవరం ప్రతినిధి:టిడిపి వ్యవస్థాపకులు నందమూరి తారక రామారావుకు ఆ పార్టీ జాతీయ అధ్యక్షులు నారా చంద్రబాబునాయుడు, ఎంఎల్‌ఎ నందమూరి బాలకృష్ణ, టిడిపి రాష్ట్ర అధ్యక్షులు కె.అచ్చెన్నాయుడు ఆదివారం ఘనంగా నివాళులర్పించారు. ఎన్‌టిఆర్‌ శత జయంతిని పురస్కరించుకుని తూర్పుగోదావరి జిల్లా రాజమహేంద్రవరం నగరంలోని కోటిపల్లి బస్టాండ్‌ సెంటర్లోని ఎన్‌టిఆర్‌ విగ్రహానికి వారు పూలమాలలు వేశారు. రాజమహేంద్రవరం రూరల్‌ ఎంఎల్‌ఎ గోరంట్ల బుచ్చయ్యచౌదరి ఆధ్వర్యంలో ఈ కార్యక్రమం నిర్వహించారు. ఎన్‌టిఆర్‌ విగ్రహాన్ని పూలదండలతో, కోటిపల్లి బస్టాండ్‌ సెంటర్‌ను పసుపు రంగు జెండాలతో అలంకరించారు. ఉదయం తొమ్మిది గంటలకే చంద్రబాబు వస్తారన్న సమాచారంతో రాజమహేంద్రవరంలోని మాజీ కార్పొరేటర్లు, పార్టీ కార్యకర్తలు, ఎన్‌టిఆర్‌ అభిమానులు వేలాదిగా తరలివచ్చారు. ఎన్‌టిఆర్‌ విగ్రహం వద్దకు చంద్రబాబు 11 గంటలకు చేరుకున్నారు. కాబోయే సిఎం, జై బాబు అంటూ కార్యకర్తల నినాదాలతో ఆ ప్రాంతం హోరెత్తింది. ఈ కార్యక్రమానికి బాలకృష్ణ రాకతో ప్రత్యేకత సంతరించుకుంది. ఆయనతో సెల్ఫీలు దిగేందుకు అభిమానులు ఉత్సాహం చూపించారు. జై బాలయ్య నినాదాలతో కొద్దిసేపు హోరెత్తించారు. అభిమానులకు బాలకృష్ణ అభివాదం చేస్తూ చంద్రబాబుతో కలిసి మహానాడు ప్రాంగణానికి వెళ్లిపోయారు. ఈ కార్యక్రమం నేపథ్యంలో పోలీసులు కొద్దిసేపు ట్రాఫిక్‌ మళ్లించారు.
