ప్రజాశక్తి-అమరావతి బ్యూరో :రాష్ట్రంలో గతేడాది నవంబరు 28న విడుదలైన సివిల్‌, రిజర్వ్‌ సబ్‌ ఇన్‌స్పెక్టర్ల నోటిఫికేషన్‌లో అర్హులైన 57,923 మంది అభ్యర్థులకు ఈ నెల 21 నుంచి ఆగస్టు 4 వరకు సర్టిఫికెట్‌ వెరిఫికేషన్‌ చేపట్టనున్నట్లు రాష్ట్రస్థాయి పోలీస్‌ రిక్రూట్‌మెంట్‌ బోర్డు ఛైర్మన్‌ అతుల్‌ సింగ్‌ తెలిపారు. ఈ మేరకు బుధవారం సర్టిఫికెట్‌ వెరిఫికేషన్‌ షెడ్యూల్‌ను విడుదల చేశారు. సబ్‌ ఇన్‌స్పెక్టర్‌ పోస్టులకు ఈ ఏడాది ఫిబ్రవరి 19న రాత పరీక్షలు నిర్వహించామన్నారు. ఈ పరీక్షల్లో క్వాలిఫై అయిన 57,923 మందికి విశాఖపట్నం, ఏలూరు, గుంటూరు, కర్నూలులో ఈ సర్టిఫికేట్ల వెరిఫికేషన్‌ వుంటుందని తెలిపారు. సర్టిఫికెట్‌ వెరిఫికేషన్‌కు హాజరయ్యే అభ్యర్థులంతాslrb.ap.gov.in వెబ్‌సైట్‌లో దరఖాస్తు చేసుకోవాలని కోరారు. అభ్యర్థులు తమ ఒరిజనల్‌ సర్టిఫికెట్లతో హాజరుకావాలని సూచించారు.
