ప్రజాశక్తి-విజయనగరం : వన్‌ డిస్ట్రిక్ట్‌ వన్‌ ప్రొడక్ట్‌ క్రింద అవార్డుకు బొబ్బిలి వీణ నామినేట్‌ అయినందున ఇన్వెస్ట్‌ ఇండియా టీం వెరీఫి కేషన్‌ టీమ్‌ గురువారం గొల్లపల్లి గ్రామంలో పర్యటించింది. వీణలను తయారు చేసే హస్త కళాకారులతో జె.సి మయూర్‌ అశోక్‌, సభ్యులు రవిన్‌ చరియన్‌, సమీర ముఖాముఖి చర్చించారు. వీణల తయారీ వలన ఎంత ఆదాయం పొందుతున్నారు, ఉపాధి ఎలా ఉందని ప్రశ్నించారు. హస్త కళాకారుడు లక్ష్మీనారాయణ మాట్లాడుతూ ఈ వీణల తయారీకి పనస ఏక కర్రను వినియోగిస్తామని తెలిపారు. పెద్ద వీణ తయారీకి ఒక నెల రోజులు పడుతుందని, లక్కతో పాలిషింగ్‌ చేస్తామని, 15 వేలు రూపాయల వరకు వస్తుందని తెలిపారు. చిన్న వీణల తయారీకి 10 వేల వరకు వస్తుందన్నారు. వంశ పారంపర్యంగా వస్తున్న కళ కావునా నిలబెడుతూ వస్తున్నామని, తగిన ప్రోత్సాహం, యంత్ర పరికరాలు సమకూరిస్తే కొనసాగిస్తామని వివరించారు. జాయింట్‌ కలెక్టర్‌ మయూర్‌ అశోక్‌ మాట్లాడుతూ వీణల తయారీకి అవసరమైన నైపుణ్య శిక్షణ ఇస్తామని, ఆకర్షణీయంగా తయారు చేసిన వాటికి మార్కెటింగ్‌ కు అవకాశాలు కల్పిస్తామని తెలిపారు. కార్యక్రమంలో చేనేత అధికారి మురళీ కృష్ణ, చేనేత అభివృద్ధి అధికారి వసంత తదితరులు పాల్గొన్నారు.
