ప్రజాశక్తి-విజయనగరం టౌన్‌ : విద్యుత్‌ ఛార్జీలను పెంచుతూ తీసుకొస్తున్న సంస్కరణలను రద్దు చేయాలని డిమాండ్‌ చేస్తూ ఈనెల 19న విజయనగరంలో జరిగే రాష్ట్ర సదస్సును జయప్రదం చేయాలని సిపిఎం జిల్లా కార్యదర్శి తమ్మినేని సూర్యనారాయణ పిలుపునిచ్చారు. సోమవారం స్థానిక ఎల్‌బిజి భవనంలో ఏర్పాటు చేసిన విలేకరుల సమావేశంలో సదస్సుకు సంబంధించిన వాల్‌పోస్టర్‌ను ఆవిష్కరించారు. అనంతరం ఆయన మాట్లాడుతూ రాష్ట్రంలో రోజురోజుకూ విద్యుత్తు బిల్లులు పెరగడంతో సామాన్య ప్రజలు తీవ్ర ఇబ్బందులు పడుతున్నారని తెలిపారు. కేంద్ర, రాష్ట్ర ప్రభుత్వాలు కుమ్మక్కై ప్రజలకు షాక్‌ ఇస్తున్నాయని ఆందోళన వ్యక్తం చేశారు. గత ఏడాది విద్యుత్తు ఛార్జీలు పెంచి రూ.1400 కోట్ల భారం మోపిందని గుర్తు చేశారు. గత పదేళ్లగా వాడుకున్న కరెంటుకు ప్రజలు బిల్లులు కట్టినా మళ్లీ సర్దుబాటు ఛార్జీల పేరుతో జనం నెత్తిన తాజాగా రూ.6 వేల కోట్ల భారం వేశారన్నారు. నాలుగేళ్లలో 25 వేల కోట్ల రూపాయలు భారం మోపారని తెలిపారు. ఈనెల బిల్లులో 2014 సంవత్సరంలో వాడుకున్న కరెంటుకు మళ్లీ యూనిట్‌ కి 20 పైసలు, 2021 మే నెలలో వాడిన విద్యుత్తు యూనిట్కు మరో 20 పైసలు, 2023 ఏప్రిల్‌ నెలలో ఉపయోగించిన కరెంటుకు యూనిటుకు 40 పైసలు కలిపి మొత్తం యూనిట్‌ కు 80 పైసలు చొప్పున జనం నెత్తిన భారం వేశారన్నారు. కేంద్ర ప్రభుత్వానికి తొత్తులుగా మారి టిడిపి, జనసేన పార్టీలు కూడా ప్రశ్నించకుండా పేదలకు అన్యాయం చేస్తున్నాయని విమర్శించారు. కేంద్ర, రాష్ట్ర ప్రభుత్వాలు అనుసరించే కార్పోరేట్‌ అనుకూల, ప్రజావ్యతిరేక విధానాలకు వ్యతిరేకంగా అక్టోబర్‌ 19న జరిగే రాష్ట్ర సదస్సును జయప్రదం చేయాలని పిలుపునిచ్చారు. ఈ సదస్సుకు సిపిఎం రాష్ట్ర కార్యదర్శి వర్గ సభ్యులు బి. తులసిదాసు, సి.హెచ్‌ నర్శింగరావు హాజరవుతారని తెలిపారు. సమావేశంలో సిపిఎం జిల్లా కార్యదర్శి వర్గ సభ్యులు వి.లక్ష్మి, ఆర్‌.శంకరరావు పాల్గొన్నారు.
