విద్యుత్తు శాఖకు సంబంధించిన పలు వస్తువులు చోరీకి గురవుతున్నాయి. విద్యుత్తు స్తంభాలు, కేబుల్‌ వైర్లు, ఇతర సామగ్రి అపహరించుకుపోతూ అనధికారకంగా ప్రయివేటు వ్యక్తులకు లైన్లు ఏర్పాటు చేస్తూ సొమ్ము చేసుకుంటున్నారు. రెండు ట్రాన్స్‌ఫార్మర్లను దొంగలు ఎత్తుకెళ్లినా, ట్రాన్స్‌ఫార్మర్‌లోని కాపర్‌ చోరీకి గురైనా అధికారులు ఇంతవరకు చర్యలు చేపట్టకపోవడం పలు అనుమానాలకు తావిస్తోంది. అదే శాఖలో చెందిన కొంతమంది సిబ్బంది.. ప్రయివేట్‌ వ్యక్తులతో చేతులు కలిపి ఇలాంటి చోరీలకు పాల్పడుతున్నారనే ఆరోపణలు సర్వత్రా వినిపిస్తున్నాయి.
ప్రజాశక్తి-మక్కువ: మండలంలోని పలు ప్రాంతాల్లో పనిచేయని ట్రాన్స్‌ఫార్మర్లు ఉన్న విషయం సంబంధిత సిబ్బందికి తప్ప మిగతా వ్యక్తులకు తెలియదు. అలాంటి ట్రాన్స్‌ఫార్మర్లలో కాపర్‌ వైర్లు చోరీ చేస్తూ పబ్లిక్‌గా రహదారిపై పడేసే సందర్భాలు కూడా చోటు చేసుకోవడం గమనార్హం. దొంగిలించిన పరికరాలతో దూరప్రాంతాల్లో ఉండే పొలాలకు అనధికారంగా విద్యుత్తు లైన్లు కలుపుకుపోతున్నారనే ఆరోపణలు కూడా వ్యక్తమవుతున్నాయి. శంబర గ్రామంలో పెద్దమనిషిగా వ్యవహరిస్తున్న ఓ వ్యక్తి పెద్దవలస సమీపంలో తన పొలంలోకి అక్రమ విద్యుత్తు కనెక్షన్‌ ఏర్పాటు చేయడంతో అక్కడ రైతుల మధ్య కొంత వివాదం నెలకొంది. ఇటీవల విద్యుత్తు శాఖలో చోటుచేసుకున్న పరిణామాలు నేపథ్యంలో సదరు పెద్దమనిషి.. రైతుల ఆగ్రహానికి గురై కేబుల్‌ను తొలగించి ఖాళీ స్తంభాలను అలాగే ఉంచుకున్నారని తెలిసింది. ఇలాంటి పనులకు తెగబడుతున్న విద్యుత్తు సిబ్బందిని ఉన్నతాధికారులు సైతం విచారణ సమయంలో అసలు సమాచారాన్ని పంపించకుండా మామ్మూళ్ల మత్తులో జోగుతున్నారని ఆరోపణలు బలంగా వినిపిస్తున్నాయి.
డామేజ్‌ పేరుతో లూటీ?
విద్యుత్తు శాఖలో ఉండే పరికరాలు ఏవీ కూడా చంకలో పెట్టి పట్టుకుపోయేవి కాదన్న సంగతి అందరికీ తెలిసిందే. అయితే ఆ శాఖ నిబంధనలను తమకు అనుకూలంగా మార్చుకుంటూ కొంతమంది వ్యక్తులు ప్రభుత్వ ఆస్తిని కాజేస్తున్నారని తెలుస్తోంది. ప్రమాదకరంగా విద్యుత్తు స్తంభాలు ఉన్నాయంటూ, వాటి స్థానంలో కొత్త వాటిని నియమించాలంటూ, వాటికి సంబంధించిన కేబుల్‌, ఇతర పరికరాలు ప్రభుత్వం ద్వారా డ్రా చేసుకొని ఇలా దొంగచాటు వ్యవహారాలకు వినియోగిస్తూ ఉంటారని పలువురు చర్చించుకుంటున్నారు. రైతుల పొలాలకు వేసే విద్యుత్తు కనెక్షన్లలో అంచనాలు ఎక్కువ చూపి, రికార్డుల్లో చూపిన వాటికంటే తక్కువ స్తంభాలను వినియోగించి, కొన్ని స్తంభాలను పక్కన పెట్టి ప్రయివేటు వ్యక్తులకు రహస్యంగా విక్రయిస్తున్నారనే ఆరోపణలు వస్తున్నాయి. ఇవన్నీ ఉన్నతాధికారులకు తెలిసినా వారికి కూడా వెళ్లాల్సిన మొత్తాలు ఐదు శాతం నుండి 25 శాతం వరకు ఆయా పనులు బట్టి సంబంధిత సిబ్బంది చేరవేస్తారని చర్చ సాగుతోంది. దీంతో తప్పులను సరిదిద్దాల్సిన అధికారులు తప్పుడు సమాచారాలను ఉన్నతాధికారులకు చేరవేస్తూ, వీరిని రక్షిస్తున్నారనే ఆరోపణలు వస్తున్నాయి. ఇప్పటికైనా ఉన్నతాధికారులు పారదర్శకంగా విచారణ చేపడితే మరెన్నో అక్రమాలను అరికట్టి, ప్రభుత్వ ఆస్తిని కాపాడవచ్చని పలువురు అభిప్రాయపడుతున్నారు.
