ప్రజాశక్తి-బొబ్బిలి : విద్యుత్తు ఛార్జీల పెంపుతో సామాన్యులపై భారాలు పడుతున్నాయని వామపక్ష నాయకులు ఆగ్రహం వ్యక్తం చేశారు. విద్యుత్తు ఛార్జీల పెంపునకు వ్యతిరేకంగా వామపక్షాల ఆధ్వర్యంలో శనివారం బృందావనం ఫంక్షన్‌ హాల్లో రౌండ్‌టేబుల్‌ సమావేశం నిర్వహించారు. ఈ సందర్భంగా సిపిఎం జిల్లా కార్యదర్శివర్గ సభ్యులు పి.శంకరరావు, సిపిఐ పట్టణ కార్యదర్శి ఎం.శ్రీనివాస్‌, సిపిఐ ఎంఎల్‌ జిల్లా నాయకులు ఎం.గోపాలం, ముస్లిం మైనారిటీ సంఘం నాయకులు జాఫర్‌ మాట్లాడుతూ విద్యుత్తు ఛార్జీలు పెంపుతో సామాన్యులపై ఆర్థిక భారం పడుతుందన్నారు. గతంలో వినియోగించిన విద్యుత్తుకు అనేక రూపాలలో ఇప్పుడు వసూలు చేయడం దుర్మార్గమన్నారు. పెంచిన విద్యుత్తు ఛార్జీలను తగ్గించాలని డిమాండ్‌ చేశారు. దీనిపై సోమవారం ఎన్‌టిఆర్‌ బొమ్మ జంక్షన్‌ వద్ద నిరసన చేపట్టేందుకు రౌండ్‌ టేబుల్‌ సమావేశం తీర్మానించింది. కార్యక్రమంలో ఎపి రైతు సంఘం జిల్లా అధ్యక్షులు ఎస్‌.గోపాలం, పట్టణ కళాసీ సంఘం అధ్యక్షులు బి.అప్పలస్వామి, ప్రజా సంఘాల నాయకులు చంద్ర, ఎన్నాబాబు, తదితరులు పాల్గొన్నారు.
నెల్లిమర్ల : పెంచిన విద్యుత్‌ ఛార్జీలు వెంటనే తగ్గించాలని వామపక్ష నేతలు డిమాండ్‌ చేశారు. శనివారం విద్యుత్‌ ఛార్జీలు తగ్గించాలని కోరుతూ స్థానిక మొయిద జంక్షన్‌లో వామపక్షాలు ఆధ్వర్యంలో పెంచిన విద్యుత్‌ ఛార్జీలపై ప్రచారం నిర్వహించారు. ఈ సందర్భంగా సిపిఎం, సిపిఐ, న్యూ డెమోక్రసీ నేతలు మాట్లాడుతూ కేంద్ర, రాష్ట్ర ప్రభుత్వాలు దుర్మార్గంగా విద్యుత్‌ ఛార్జీలు పెంచి సామాన్య ప్రజానీకంపై పెను భారం వేశారన్నారు. కేంద్రంలోని బిజెపి ప్రభుత్వం ప్రతిపక్షంలో ఉన్నప్పుడు ఒకలాగ, అధికారంలోకి వచ్చిన తర్వాత ఇంకొకలా మాట్లాడి విద్యుత్‌ సంస్కరణల పేరిట చార్జీలు పెంచడం దారుణమన్నారు. రాష్ట్ర ప్రభుత్వం కూడా కేంద్రానికి వత్తాసు పలికి 7సార్లు అదనపు చార్జీల పేరిట విద్యుత్‌ ఛార్జీలు పెంచి స్వామి భక్తిని చాటుకున్నారని విమర్శించారు. ఇప్పటికే బిజెపి ప్రభుత్వం విధానాల వల్ల నిత్యావసర వస్తువుల ధరలు పెరిగి ఇబ్బందులు పడుతుంటే విద్యుత్‌ ఛార్జీలు పెరిగి ఇబ్బందులు పడుతున్నారన్నారు. పెంచిన విద్యుత్‌ ఛార్జీలు వెంటనే తగ్గించాలని డిమాండ్‌ చేశారు. కాగా విద్యుత్‌ ఛార్జీలు పెంచిన ప్రభుత్వం అప్రకటిత కోతలు విధించి సామాన్య ప్రజలను, రైతులను ఇబ్బందులకు గురి చేస్తుందన్నారు. పెంచిన విద్యుత్‌ ఛార్జీలపై ఇదేమిటని అడిగితే కేసులు పెట్టడం దారుణమన్నారు. ఈ కార్యక్రమంలో వామ పక్ష నేతలు కిల్లంపల్లి రామారావు, మొయిద పాపారావు, కాళ్ళ అప్పల సూరి పాల్గొన్నారు.
