ప్రజాశక్తి-బొబ్బిలి : రోజురోజుకూ పెరుగుతున్న విద్యుత్‌ఛార్జీల పెంపును నిరసిస్తూ స్థానిక ఎన్‌టిఆర్‌ బొమ్మ సెంటర్‌లో వామపక్షాల ఆధ్వర్యాన సోమవారం ధర్నాచేశారు. ధర్నాను ఉద్దేశించి సిపిఎం నాయకులు పి.శంకర్రావు, సిపిఐ నాయకులు ఎస్‌.గోపాలం, సిపిఐ ఎంఎల్‌ న్యూడెమోక్రసీ నాయకులు ఎం.గోపాలం మాట్లాడారు. కేంద్రరాష్ట్ర ప్రభుత్వాలు విద్యుత్తు రంగంలో తెస్తున్న సంస్కరణల వల్ల ప్రజలపై తీవ్రభారాలు పడుతున్నాయని, ఈ భారాలను ప్రతిఘటించాలని పిలుపునిచ్చారు.
విద్యుత్తు వాడకం పెరగకపోయినా ప్రభుత్వం ఒకేసారి సర్దుబాటు ఛార్జీల పేరుతో మూడు పోట్లు పొడిచిందని అన్నారు. కేంద్ర, రాష్ట్ర ప్రభుత్వాలు కుమ్మక్కై ప్రజలకు షాక్‌ ఇస్తున్నాయని అన్నారు. గత ఏడాది కరెంటు ఛార్జీలు పెంచి రూ.1400 కోట్ల భారం మోపిందన్నారు. మోడీ, జగన్‌ కలసి సామాన్యుల నడ్డి విరుస్తున్నారు. కార్పొరేట్ల దోపిడీ ఆపితే ప్రభుత్వాల అవినీతిని అరికడితే కరెంటు ఛార్జీలు పెంచకుండా తగ్గించవచ్చునని అన్నారు. ఈనేపథ్యంలో ప్రజలు మరో విద్యుత్‌ ఉద్యమానికి సిద్ధం కావాలని పిలుపునిచ్చారు. సిపిఐ నాయకులు ఎం.శ్రీనివాస్‌, కోట అప్పన్న, పికెఎస్‌ నాయకులు పిల్లా లక్ష్మణరావు, పట్టణ కళాసి సంఘం నాయకులు భోగాది అప్పలస్వామి, ఎ.అప్పారావు తదితరులు పాల్గొన్నారు.
