ప్రజాశక్తి-విజయనగరం టౌన్‌ : రోజురోజుకూ పెరుగుతున్న విద్యుత్‌ ఛార్జీలను ప్రజలంతా ప్రతిఘటించాలని వామపక్షాల నాయకులు పిలుపునిచ్చారు. మంగళవారం స్థానిక ఎల్‌బిజి భవనంలో ఏర్పాటు చేసిన విలేకర్ల సమావేశంలో సిపిఎం జిల్లా కార్యదర్శి తమ్మినేని సూర్యనారాయణ, సిపిఐ జిల్లా కార్యదర్శి ఒమ్మి రమణ, సిపిఐఎంఎల్‌ నాయకులు బి.శంకర్రావు మాట్లాడారు. రాష్ట్ర ప్రభుత్వం ఒకేసారి సర్దుబాటు ఛార్జీల పేరుతో మూడు పోట్లు పొడిచిందని, కేంద్ర, రాష్ట్ర ప్రభుత్వాలు కుమ్మక్కయి ప్రజలకు షాక్‌ ఇస్తున్నాయని అన్నారు.. గత ఏడాది కరెంటు ఛార్జీలు పెంచి ప్రజలపై రూ.1400 కోట్ల భారం మోపిందన్నారు. ప్రజల కళ్లు కప్పి గత పదేళ్ల నుంచి వాడుకున్న కరెంటుకు బిల్లులు కట్టినా మళ్లీ సర్దుబాటు ఛార్జీల పేరుతో జనం నెత్తిన తాజాగా రూ.6వేల కోట్ల రూపాయల భారం వేశారన్నారు. నాలుగేళ్లలో రూ.25 వేల కోట్లు ప్రజల నెత్తిన భారం మోపారన్నారు. మోడీ ప్రభుత్వ ఆదేశాలకు లొంగిపోయిన జగన్‌ ప్రభుత్వం ప్రతి నెలా వంటగ్యాస్‌ లాగానే కరెంటు ఛార్జీలు కూడా పెంచడానికి ఆదేశాలు ఇచ్చేశారన్నారు. విద్యుత్తు ఛార్జీల పెంపునకు వ్యతిరేకంగా బుధవారం నుంచి ప్రజలను చైతన్య వంతులను చేసి భవిష్యత్‌ పోరాటాలకు సిడ్డమవుతామని పిలుపు నిచ్చారు. అందులో భాగంగా ఈనెల 13న అన్ని పార్టీలు, ప్రజా సంఘాలతో కలిపి రౌండ్‌ టేబుల్‌ సమావేశం నిర్వహిస్తామని తెలిపారు. కార్యక్రమంలో సిపిఎంకార్యదర్శి వర్గ సభ్యులు టివి రమణ, లక్ష్మి పాల్గొన్నారు.
