ప్రజాశక్తి-విజయనగరం : ప్రతి ఏటా జరిగే కార్యక్రమాలతో పాటు ఈ ఏడాది విజయనగరం ఉత్సవాలకు రెండు అదనపు ఆకర్షణలు తోడైనట్లు కలెక్టర్‌ ఎస్‌.నాగలక్ష్మి వెల్లడించారు. అక్టోబరు 29, 30 తేదీల్లో విజయనగరం ఉత్సవాలు ఈ ప్రాంత చారిత్రక, సాంస్కతిక వైభవాన్ని కళ్లకు కట్టేలా ప్రదర్శించేందుకు అన్నివిధాలా ఏర్పాట్లు చేస్తున్నామని వెల్లడించారు. విజయనగర ఉత్సవాల నిర్వహణకు జరుగుతున్న ఏర్పాట్లను పరిశీలించే నిమిత్తం జాయింట్‌ కలెక్టర్‌ మయూర్‌ అశోక్‌, అదనపు ఎస్‌పితో కలసి ఉత్సవాల వేదికలను సందర్శించారు. ఈ సందర్భంగా మీడియాతో కలెక్టర్‌ మాట్లాడుతూ ఈ ఏడాది ఉత్సవాల సందర్భంగా అఖిల భారత డ్వాక్రా ఉత్పత్తుల ప్రదర్శనను విజయనగరంలో ఏర్పాటు చేస్తున్నట్టు వెల్లడించారు. అక్టోబరు 28 నుంచి నవంబరు 8వ తేదీ వరకు పది రోజులపాటు స్థానిక అంబేద్కర్‌ కూడలి వద్ద వున్న మాన్సాస్‌ మైదానంలో జరిగే ఈ ప్రదర్శనలో వివిధ రాష్ట్రాల నుంచి 200 స్టాల్స్‌ను డ్వాక్రా సంఘాలు ఏర్పాటు చేయనున్నాయని చెప్పారు. ఉత్సవాలను సందర్శించే వారికి ఈ ప్రదర్శన ఒక గొప్ప షాపింగ్‌ అనుభూతిని కలగిస్తుందన్నారు.
దీంతోపాటు కోట సమీపంలోని బొంకులదిబ్బ వద్ద సురభి నాటకాల ప్రదర్శన 29 నుంచి 31 వరకు మూడురోజుల పాటు ఏర్పాటు చేస్తున్నట్టు చెప్పారు. 29న నగరంలోని అమ్మవారి ఆలయం నుంచి గురజాడ కళాక్షేత్రం వరకు నిర్వహించే కళాబృందాలు, విద్యార్ధుల సాంస్కతిక ప్రదర్శనతో ఉత్సవాలు ప్రారంభమవుతాయన్నారు. ప్రదర్శన అనంతరం ప్రారంభోత్సవ కార్యక్రమం గురజాడ కళాక్షేత్రంలో జరుగుతుందన్నారు. నగరంలోని తొమ్మిది వేదికల్లో ఉత్సవాలు నిర్వహించేందుకు ఏర్పాట్లు చేస్తున్నట్లు కలెక్టర్‌ తెలిపారు. గత ఏడాది సాహితీ, ఆధ్యాత్మిక కార్యక్రమాలు నిర్వహించిన శ్రీమన్నార్‌ రాజగోపాలస్వామి ఆలయంలో జరగాల్సిన కార్యక్రమాలను లేడీస్‌ రిక్రియేషన్‌ క్లబ్‌నకు మార్పు చేశామన్నారు. అయోధ్య మైదానంలో 30వ తేదీ రాత్రి మెగా మ్యూజికల్‌ నైట్‌, అదే రోజు సాయంత్రం పెట్‌ షో నిర్వహిస్తామన్నారు. సంగీత, నృత్య కళాశాలలో ఫల పుష్ప ప్రదర్శన, లయన్స్‌ కమ్యూనిటీ హాలులో జానపద, మార్షల్‌ ఆర్ట్స్‌ కళారూపాల ప్రదర్శన, గురజాడ కళాక్షేత్రంలో నాటికల ప్రదర్శన, ఆనందగజపతి ఆడిటోరియంలో స్థానిక కళాకారులచే శాస్త్రీయ సంగీత, నత్య కార్యక్రమాల ప్రదర్శన వుంటాయన్నారు. కోటలో ఈ ఏడాది పాఠశాల విద్యార్ధులతో పాటు కళాశాల విద్యార్ధులను కూడా భాగస్వామ్యం చేస్తూ విజ్ఞాన ప్రదర్శనలు ఏర్పాటు చేస్తామన్నారు.రాజీవ్‌ స్టేడియంలో ఈనెల 26 నుంచే ఐదు రోజులపాటు క్రీడా పోటీలు నిర్వహిస్తామన్నారు. పర్యటనలో కార్పొరేషన్‌ కమిషనర్‌ శ్రీరాములు నాయుడు, మెప్మా పీడీ సుధాకర్‌, డిఆర్‌డిఎ పీడీ కళ్యాణ్‌ చక్రవర్తి, ఇపిడిసిఎల్‌. ఎస్‌ఇ, అదనపు ఎస్‌పి, సిపిఒ బాలాజీ, ఎస్‌డిసిలు వెంకటేశ్వరరావు, సుదర్శన దొర, పద్మలత, పశుసంవర్ధక శాఖ జెడి విశ్వేశ్వరరావు తదితరులు పాల్గొన్నారు.
