ప్రజాశక్తి - హోళగుంద
మండలంలోని ఇంగలదహల్‌ గ్రామంలో నిర్వహించిన ఉచిత వైద్య శిబిరానికి విశేష స్పందన లభించింది. దేవరగట్టు ఆలయ మాజీ ఛైర్మన్‌, శ్రీశైల ఆలయ మాజీ ఛైర్మన్‌ కీర్తిశేషులు కెసి.తిమ్మారెడ్డి జయంతి సందర్భంగా తిమ్మారెడ్డి యూత్‌ అసోసియేషన్‌ ఆధ్వర్యంలో కర్నూలు ఓమ్మి హాస్పిటల్‌ వైద్యనిపుణుల సహకారంతో శుక్రవారం ఉచిత వైద్య శిబిరం ఏర్పాటు చేశారు. ముఖ్య అతిథులుగా కెసి.తిమ్మారెడ్డి కుటుంబ సభ్యులు రాజేశ్వర్‌ రెడ్డి, కె.కార్తీక్‌ రెడ్డి, ఓమ్ని హాస్పిటల్‌ ప్రత్యేక వైద్యులు, గుండె వైద్య నిపుణులు కె.ఇందు ప్రకాష్‌ రెడ్డి, అఖిల్‌ రానా కేసరి హాజరయ్యారు. వైద్య శిబిరానికి చుట్టుపక్కల గ్రామస్తులు వచ్చారు. గుండె సంబంధిత చికిత్సలు, ఈసిజి తీసి, మందులు పంపిణీ చేశారు. వినోద్‌, హుస్సేన్‌ పీరా, అద్భుత్‌ కుమార్‌లు రక్త పరీక్షలు నిర్వహించారు. ఎంపిటిసి మల్లికార్జున, హాస్టల్‌ వార్డెన్‌ శివుడు, వీరేష్‌, చంద్రశేఖర్‌ పాల్గొన్నారు.
