రాజుగారి రహస్య గది
గది నిండా భయం సిద్ధంగుంది
అతి త్వరలో సునామీలా
విరుచుకు పడబోతుంది!?
రెడ్‌ అలర్ట్‌..... రెడ్‌ అలర్ట్‌
మొదటి అల పెద్దల అలజడి
రెండో అల మధ్య వయస్కులు
యువతీయువకుల మత్యుఒడి
మూడో అల పిల్లల చిత్తడి
పగబడుతోంది వైరస్‌
వయసుల వారీగా ...
గొప్ప శాస్త్ర జోస్యం
ఎవరో వల పన్నారు
మూడో అల-అంతర్జాతీయ మార్కెట్‌ వల
రాజకీయ భారతం జిందాబాద్‌
ఔనౌను ఉగ్రరూపం దాల్చిన
రాకాసి అల ఏదో
విజృంభిస్తోన్న పథక రచన
భయమొక పెట్టుబడి
ఇదో యుద్ధ సమయం
గొప్ప వ్యాపార సందర్భం
అనేకానేక నిర్లక్ష్యాల
వైఫల్యాల మధ్య
కరోనా కంటే అత్యంత
ప్రమాదకారి నిలువెత్తు రాజ్యమే!
రాజ్యాన్నేలే పాలకవర్గమే.
టెస్టింగ్‌.. ట్రెసింగ్‌.. ట్రీట్మెంట్‌
అంతా ఒక అబద్ధం!
అధికార కాంక్ష.. పదవీ వ్యామోహం..
గెలుపు గుర్రాల ఆనందం కంటే రాజ్యానికి
ప్రజల ప్రాణాలేమంత ముఖ్యం కానేకాదు
దేశ పాలకులు కరోనాను
లంచం రుచి చూపించారు.!
లొంగిపోయి వారు చెప్పినట్టే
వింటోంది!
దేశం ఒక అబద్ధం మీద నడుస్తోంది.
ప్రపంచాన్ని ఒక వ్యాపారం
నడిపిస్తున్నది
మనుషుల ప్రాణాలదేముంది?
దేశాలకు రెవెన్యూ కావాలి!
ఒక నిర్లక్ష్యం దేశాన్ని
గాలాడని స్థితిలోకి నెట్టింది
ఒక వైఫల్యం దేశాన్ని
శ్మశానం చేసింది
రాజ్యం కాటికాపరి!
మంటల్లో బూడిదైన
అస్తికల్ని భద్రపరిచే పనిలో
తలమునకలౌతోంది
అంతా ఒక దిక్కుతోచని స్థితి !
- శిఖా-ఆకాష్‌
