ప్రజాశక్తి - విజయనగరం ప్రతినిధి : త్వరలో మూడోవిడత భూసర్వే చేపట్టేందుకు సిద్ధంగా ఉన్నామని ల్యాండ్స్‌ అండ్‌ సర్వే రికార్డ్స్‌ అధికారి టి.త్రివిక్రమరావు తెలిపారు. ఇప్పటికే రెండు దఫాలుగా చేపట్టిన సర్వేలో ఎలాంటి పొరపాట్లు, అనుమానాలకు తావులేకుండా ముగించామని స్పష్టం చేశారు. తొలుత గ్రామ కంఠాలు, ప్రభుత్వ స్థలాలు గుర్తించి, ఆ తరువాతే పాత రికార్డులు, పట్టాదారు పాసుపుస్తకాల ఆధారంగా ప్రైవేటు భూములను విభజిస్తున్నామని తెలిపారు. పనితీరులో విజయనగరం జిల్లా రాష్ట్రానికే ఆదర్శంగా నిలిచిందని, అందువల్లే ఇటీవల మూడు జిల్లాలకు చెందిన అధికారులు అధ్యయనం చేసేందుకు మన జిల్లాకు వచ్చారని గుర్తుచేశారు. సర్వే పూర్తికాగానే సంబంధిత మండల రెవెన్యూ అధికారులు పట్టాదారు పాసుపుస్తకాలు కూడా మంజూరు చేస్తున్నారని వివరించారు. ఈ వారం తనను కలిసిన ప్రజాశక్తికి ముఖాముఖీ ఇంటర్వూ ఇచ్చారు. వివరాలు ఆయన మాటల్లోనే...
ఇప్పటి వరకు ఎన్ని గ్రామాల్లో రీసర్వే పూర్తయింది?
జిల్లా వ్యాప్తంగా 983 రెవెన్యూ గ్రామాలు ఉన్నాయి. ఇందులో మొదటి విడత 179 గ్రామాల్లో వెఎస్‌ఆర్‌ జగనన్న శాశ్వత భూ హక్కు- భూ రక్ష పేరిట ప్రభుత్వం తలపెట్టిన సమగ్ర భూసర్వే చేపట్టాం. విజయవంతం కావడంతో రెండో విడతలో మరో 198 గ్రామాల్లో సర్వే చేపట్టింది. ప్రస్తుతం మూడో విడతలో 160 గ్రామాల్లో సర్వే చేపట్టేందుకు ప్రణాళిక సిద్ధం చేశాం.
సర్వే చేపట్టే పద్ధతి ఎలా ఉంటుంది?
సర్వే ప్రక్రియలో భాగంగా తొలుత గ్రామాన్ని యూనిట్‌గా తీసుకుని డ్రోన్‌ ద్వారా భౌగోళిక సరిహద్దులను ధ్రువీకరిస్తున్నాం. దాని ఆధారంగా ముందుగా గ్రామ కంఠం, ప్రభుత్వ భూములు, చెరువులు, కొండలు, వాగులు వంటివి గుర్తిస్తున్నాం. ఆ తరువాత వ్యక్తులకు చెందిన భూ కమతాలను సర్వే నెంబర్ల ఆధారంగా సరిచేస్తున్నాం. ఇన్ని పద్ధతులు అవలంభించడం వల్ల ఒకరి భూమి, మరొకరి పేరున వెళ్లేందుగానీ, పొరపాట్లుగానీ జరిగేందుకు ఆస్కారమే ఉండదు.
యజమాని ఆధీనంలోవున్న భూములకు, రికార్డులకు తేడావుంటే పరిష్కారం ఎలా?
అందుకే సర్వే సమయంలో పక్కపక్కన ఉన్న భూముల యజమానులను కూడా పిలుస్తున్నాం. వారి సమక్షంలో ఆధునాతన సాంకేతిక పద్ధతుల ద్వారా కమతాల విస్తీర్ణాన్ని లెక్కించి పొందుపరుస్తున్నాం. ఎవరికైనా ఇబ్బందులు, సందేహాలు ఉంటే అక్కడికక్కడే నివృత్తి చేస్తున్నాం. అప్పటికీ సంతృప్తి చెందకపోతే అర్థమయ్యే విధంగా న్యాయం చేయడానికి గ్రామాల్లోనే తహశీల్దార్‌ ఆధ్వర్యాన మొబైల్‌ కోర్టులు కూడా ఏర్పాటు చేస్తున్నాం. ఇప్పటి వరకు ఏ ఒక్క గ్రామంలోను వివాదాలు తలెత్తలేదు. అక్కడక్కడా సందేహాలు ఏర్పడినప్పటికీ, వాటికి పరిష్కారం చూపి, యజమానుల సందేహాలను నివృత్తి చేస్తున్నాం. ఇవన్నీ పూర్తయిన తరువాతే సరిహద్దు రాళ్లు పాతుతున్నాం.
తాజా రికార్డులు, పాస్‌పుస్తుకాల మంజూరుకు అనుసరిస్తున్న పద్ధతులు ఏమిటి?
సర్వే ప్రక్రియ పూర్తి అయిన తరువాత ఆ వివరాలు తొలుత విలేజ్‌ సర్వేయర్‌ లాగిన్‌, ఆ తరువాత విఆర్‌ఒ, డిప్యూటీ తహశీల్దార్‌, తహశీల్దార్‌, ఆర్‌డిఒలకు వెళ్తాయి. అక్కడి నుంచి జిల్లా జాయింట్‌ కలెక్టర్‌కు వెళ్లిన తరువాత ఆర్‌ఒఆర్‌ (రికార్డ్‌ ఆఫ్‌ రైట్స్‌) తయారవుతుంది. ఆ వెంటనే భూమి యజమానులకు రెవెన్యూ అధికారులు పట్టాదారు పాసుపుస్తకాలు పంపిణీ చేస్తున్నారు.
సర్వే ఎప్పటిలోగా పూర్తికావచ్చు?
అది ఇప్పుడే చెప్పలేం. కానీ, ప్రస్తుతం సర్వే ప్రక్రియ వేగవంతమవుతోంది. తొలివిడత సిబ్బందికిగానీ, భూ యజమానులకు గాని ఎన్నో సందేహాలు, సమస్యలు ముందుకు వచ్చాయి. సాంకేతిక సమస్యలు కూడా ఉత్పన్నమయ్యాయి. వాటన్నింటినీ అధిగమించి సర్వే పూర్తిచేసేందుకు సుమారు ఏడాది సమయం పట్టింది. ఆ అనుభవాలు ఉపయోగించుకుని రెండో విడత కేవలం మూడు నెలల్లో పూర్తిచేశాం. మూడో విడతగానీ, ఆ తరువాతగానీ సర్వే పనులు మరింత వేగవంతంగా ముందుకు సాగుతాయని భావిస్తున్నాం.
మన జిల్లాలో అధ్యయనానికి ఎవరు వచ్చారు?
రాష్ట్రంలో అన్ని జిల్లాల కన్నా వేగంగా సర్వే పనులు ముందుకు సాగుతున్న జిల్లా కూడా మనదే. అందుకే మన జిల్లాలోని అనుభవాలను, పనితీరును ఆకలింపజేసుకునేందు తిరుపతి, నెల్లూరు, అనంతపురం జిల్లాల జాయింట్‌ కలెక్టర్లు, ఇతర ఉన్నతాధికారులు రెండు నెలల క్రితం వచ్చారు. జిల్లాలో సర్వే చేపట్టేందుకు అనుగుణంగానే సిబ్బంది ఉన్నారు. సాంకేతిక పరికరాలు కూడా తగినన్ని ఉన్నాయి.
