ప్రజాశక్తి- మెంటాడ : జగనన్న ఆరోగ్య సురక్ష కార్యక్రమం నిర్వహణలో లోపాలపై జిల్లా వ్యాప్తంగా విమర్శలు వ్యక్తమవుతున్నా అధికారుల తీరులో మార్పు కనిపించడం లేదు. స్వయానా మంత్రి బొత్స, కలెక్టర్‌ నాగలక్ష్మి హెచ్చరికలు జారీ చేసినా పరిస్థితి షరామామూలే. మండలంలోని జీటీ పేట గ్రామంలో బుధవారం జరిగిన సురక్ష కార్యక్రమం తీరుతెన్నులే ఇందుకు ఉదాహరణ. మొత్తం 600 మందికి టోకెన్లు ఇచ్చామని, సుమారు 500మందికి పరీక్షలు నిర్వహించామని అధికారులు చెబుతున్నారు. అయితే వాస్తవ పరిస్థితి అందుకు భిన్నంగా కనిపించింది. దాదాపు 300మంది వరకు హాజరైనట్టు తెలుస్తోంది. ఇంకోవైపు, కార్యక్రమం నిర్వహణలో లోపాలు యధాతధంగా కనిపించాయి. బయటి నుంచి పలువురు స్పెషలిస్టులు వస్తారని ప్రచారం చేసినా మొత్తం హాజరైన అయిదుగురు వైద్యుల్లో ఒక్కరే విజయనగరంలోని ఓ ప్రైవేట్‌ ఆస్పత్రి నుంచి వచ్చింది. మిగిలిన నలుగురూ మెంటాడ పిహెచ్‌సి, గజపతినగరం సీహెచ్‌సీ నుంచి వచ్చినవారే. కాగా, మందులిచ్చిన చోట తోపులాట జరిగినా ఎవరూ నియంత్రించ లేదు. సరైన సౌకర్యాలు లేక రోగులు ఇబ్బంది పడ్డారు. ఇక, వైద్యులు తప్పనిసరిగా తెల్ల కోటు (యాప్రాన్‌) ధరించాలని మంత్రి బొత్స ఈ నెల 7న గజపతినగరం మండలం పురిటిపెంట ఆరోగ్య సురక్ష కార్యక్రమంలో ఆదేశించినప్పటికీ జీ టీ పేటలో అది అమలు కాలేదు. దీంతో వైద్యులు ఎవరో సిబ్బంది ఎవరో గుర్తించలేక రోగులు ఇబ్బంది పడ్డారు. పరీక్షలు జరిపే చోట, మందులు ఇచ్చే చోట కుర్చీలు వేసి ఒకరి తర్వాత ఒకరుగా పంపాలని కలెక్టర్‌ నాగలక్ష్మి పిట్టాడలో ఏర్పాటు చేసిన వర్చువల్‌ కార్యక్రమంలో ఆదేశించారు. ఆమె సూచనలు అమలు కాలేదు. ఈ కార్యక్రమంపై హంగామా చేయడంతో ఎన్నో ఆశలతో వచ్చిన రోగులు, సాధారణ సేవలు, మందులతో సరిపెట్టడంతో నిరుత్సాహం చెందారు. హాజరు సంఖ్య ఆశించిన స్థాయిలో లేనందున కొందరు వైసిపి శ్రేణులు అప్పటికప్పుడు కొంతమందిని హడావుడిగా తరలించడంతో కార్యక్రమం మమ అనిపించారన్న గుసగుసలు వినిపించాయి. ముందుగా గ్రామాల్లో సర్వే చేసి గుర్తించిన రోగులను కార్యక్రమానికి తరలించడంలో అధికారులు విఫలం అయ్యారు. ఐతే కార్యక్రమాన్ని ఎంపిపి ప్రారంభించారు. ప్రారంభ సమయంలో హంగామా చేసిన అధికారులు, ప్రజా ప్రతినిధులు వెళ్లిన వెంటనే క్యూ కట్టారు.
పిహెచ్‌సిలో రోగులు ఇక్కట్లు
మెంటాడ పిహెచ్‌సిలో వాస్తవానికి ఇద్దరు వైద్యులుంటారు. వీరిద్దరూ జగనన్న సురక్ష కార్యక్రమానికి హాజరు కావడంతో పి హెచ్‌సికి వచ్చిన రోగులు ఇబ్బంది పడ్డారు. వైద్యులు రాకకోసం నిరీక్షించాల్సిన పరిస్థితి దాపురించిందని రోగులు వాపోతున్నారు.
ఆరోగ్యమే మహా భాగ్యం
ప్రజాశక్తి- బొండపల్లి
ఆరోగ్యమే మహా భాగ్యమని, అదే తమ ప్రభుత్వ విధానం అని ఎంపిపి చల్ల చలంనాయుడు అన్నారు. బుదవారం మండలంలోని అంబటివలస గ్రామంలో తహశీల్దార్‌ ప్రసాద్‌ రావు ఆద్వర్యంలో జగనన్న ఆరోగ్య సురక్షా కార్యక్రమాన్ని నిర్వహించారు. ఈ కార్యక్రమంలో వైసిపి మండల అధ్యక్షులు బొద్దల చిన్నం నాయుడు, వైద్యాధికారి ఝాన్సీ, ఇఒపిఆర్‌డి సిహెచ్‌ సుగుణాకర్‌ రావు, సర్పంచ్‌ సిరుపురపు కసవయ్య, ఎంపిటిసి తాళ్ళపూడి అప్పలనాయుడు, రౌతు శ్రీనువాసరావు, లెంక రమణ, తాళ్ళపూడి అప్పలనాయుడు, రౌతు సూరిబాబు తదితరులు పాల్గొన్నారు.
శృంగవరపుకోట: జగనన్న ఆరోగ్య సురక్షతో ప్రతి ఒక్కరికీ సంపూర్ణ ఆరోగ్యం లభిస్తుందని ఎమ్మెల్సీ ఇందుకూరి రఘురాజు అన్నారు. పట్టణంలోని సచివాలయం-3 పరిధి పంచాయతీ కార్యాలయం ఆవరణంలో నిర్వహించిన జగనన్న ఆరోగ్య సురక్ష శిబిరాన్ని ఆయన బుధవారం సందర్శించారు. ఈ కార్యక్రమంలో ఎంపిపి సండి సోమేశ్వరరావు, జెడ్‌పిటిసి ఎమ్‌.వెంకటలక్ష్మి, వైస్‌ ఎంపిపి ఇందుకూరి సుధారాజు, సర్పంచ్‌ జి.సంతోషికుమారి, ఉప సర్పంచ్‌ మోపాడ కుమార్‌, ఎంపిటిసి రామచంద్రరావు, వార్డు మెంబర్లు అడారి సూరిబాబు, భారతి, వశి మాజీ సర్పంచ్‌ కె.వెంకటరావు, నాయకులు వాకాడ రమణ, జెవిఎస్‌ ప్రసాద్‌, రమేష్‌, ఎంపిడిఒ శేషుబాబు, పంచాయితీ ఇఒ కన్నబాబు, వైద్యాధికారులు, వైద్య సిబ్బంది, పంచాయితీ కార్యదర్శులు, సచివాలయ సిబ్బంది, గ్రామ వాలంటీర్లు తదితరులు పాల్గొన్నారు.
లక్కవరపుకోట: ప్రజలందరికీ ఉపయోగపడేలా జగనన్న ఆరోగ్య సురక్ష క్యాంపులను ప్రతి గ్రామంలోనూ నిర్వహిస్తున్నామని ఎంపిపి గేదెల శ్రీనివాసరావు అన్నారు. మండలంలోని లచ్చింపేటలో బుధవారం నిర్వహించిన జగనన్న ఆరోగ్య సురక్ష శిబిరాన్ని ఎంపిపి పరిశీలించారు. ఈ కార్యక్రమంలో పిహెచ్‌సి వైద్యాధికారులు పీవీ మురళీకృష్ణ, వి శ్రీనివాస్‌, ఎంపిటిసి భూమిరెడ్డిస్వామి నాయుడు, సచివాలయ కార్యదర్శి సత్యనారాయణ, వైసిపి నాయకులు భూమిరెడ్డి రామారావు, బుడమ శ్రీనివాసరావు పాల్గొన్నారు.
కొత్తవలస: మండలంలోని దేవాడ సచివాలయం ఆవరణలో బుధవారం ప్రారంభమైన జగనన్న ఆరోగ్య సురక్ష శిబిరాన్ని ఎమ్మెల్సీ ఇందుకూరి రఘురాజు పరిశీలించారు. ఆయన మాట్లాడుతూ రాష్ట్రాన్ని ఆరోగ్య ఆంధ్రప్రదేశ్‌గా మార్చాలన్న ధృడ సంకల్పంతో వైద్య రంగంలో విప్లవాత్మక మార్పులను తీసుకు వచ్చినట్లు తెలిపారు. ఈ కార్యక్రమాన్ని ప్రతి ఒక్కరూ సద్వినియోగం చేసుకుని సంపూర్ణ ఆరోగ్య వంతులుగా ఉండాలన్నారు. ఐసిడిఎస్‌ ఆధ్వర్యంలో ఏర్పాటు చేసిన సంపూర్ణ పౌష్ఠికాహార స్టాళ్లను పరిశీలించారు. ఈ కార్యక్రమంలో జెడ్‌పిటిసి నెక్కల శ్రీదేవి, వైసిపి మండల అధ్యక్షుడు ఒబ్బిన నాయుడు, స్థానిక సర్పంచ్‌ జి.జయకుమారి, ఉప సర్పంచ్‌ అప్పలనాయుడు, స్థానిక నాయకుడు రమణ, తహశీల్దార్‌ పాత్రో, డాక్టర్‌ సీతల్‌ వర్మ, పంచాయతీ విస్తరణాధికారి ధర్మారావు, వైద్య సిబ్బంది, సచివాలయ సిబ్బంది, గ్రామ వాలంటీర్లు, తదితరులు పాల్గొన్నారు.
వేపాడ: మండలంలోని జాకేరులో బుధవారం జరిగిన జగనన్న సురక్షా కార్యక్రమాన్ని ఎంపిపి దొగ్గ సత్యవంతుడు పరిశీలించారు. ఈ కార్యక్రమంలో సర్పంచ్‌ బుద్ధ చిన్నమ్మలు, డాక్టర్‌ ఏ ధరణి, డాక్టర్‌ రజిత, డాక్టర్‌ విజయకుమార్‌, సి హెచ్‌ఒ ఆంజనేయులు, హెల్త్‌ సూపర్వైజర్‌ వెంకట్రావు, ఏఎన్‌ఎం, ఆశ వర్కర్‌, సర్పంచుల సంఘం అధ్యక్షుడు ఎన్‌ వెంకట్రావు, గ్రామ పెద్ద అప్పలనాయుడు, పంచాయతీ కార్యదర్శి ప్రభుదాసు, మండల స్థాయి అధికారులు పాల్గొన్నారు
జామి: ప్రజల ఆరోగ్యమే జగనన్న సురక్ష లక్ష్యమని ఎమ్మెల్సీ ఇందుకూరు రఘురాజు అన్నారు. బుధవారం మండలంలోని చింతాడ గ్రామంలోని మండల పరిషత్‌ ప్రాధమిక పాఠశాల ఆవరణలో జగనన్న ఆరోగ్య సురక్ష శిబిరాన్ని ఆయన సందర్శించారు. గ్రామంలో రికార్డు స్థాయిలో 420 మంది ప్రజలకు చికిత్స అందించారు. ఈ కార్యక్రమంలో సర్పంచ్‌ అప్పాన సుబ్రహ్మణ్యం, నాయకులు ముత్యాలనాయుడు, దేవుపల్లి రాము, అల్లు అప్పలనాయుడు, ఎంపిడిఒ సతీష్‌, వైద్యాధికారులు, పంచాయితీ కార్యదర్శులు, రెవెన్యూ, సచివాలయ, ఐసిడిఎస్‌ సిబ్బంది, గ్రామ వాలంటీర్లు పాల్గొన్నారు.
డెంకాడ: మండలంలోని పెద్ద తాడివాడలో జగనన్న ఆరోగ్య సురక్ష కార్యక్రమాన్ని ఎమ్మెల్యే బడ్డుకొండ అప్పలనాయుడు ప్రారంభించారు. ఈ అవకాశాన్ని ప్రతి ఒక్కరూ సద్వినియోగం చేసుకోవాలని ఆయన కోరారు. ఈ కార్యక్రమంలో ఎంపిపి బంటుపల్లి వెంకటవాసుదేవరావు, వైస్‌ ఎంపిపి పిన్నింటి తమ్మినాయుడు, వైసిపి నాయకులు చిన్న, సర్పంచులు, ఎంపిటిసిలు తదితరులు పాల్గొన్నారు.
