ప్రజాశక్తి-విజయనగరం టౌన్ : సమాజ సేవలో ఛాంబర్స్ యూత్ వింగ్ చురుకైన పాత్రను పోషించాలని డిప్యూటీ స్పీకర్ కోలగట్ల వీరభద్రస్వామి పిలుపునిచ్చారు. మంగళవారం ఛాంబర్ ఆఫ్ కామర్స్ భవనంలో జరిగిన యూత్ వింగ్ ప్రమాణ స్వీకారానికి ఆయన ముఖ్యఅతిథిగా హాజరయ్యారు. అధ్యక్షులుగా గుడిస కార్తీక్, కార్యదర్శిగా కేదారిశెట్టి వెంకన్న బాబు ఎన్నికయ్యారు. ఈ సందర్భంగా కార్యవర్గ సభ్యులందరూ ప్రమాణ స్వీకారం చేశారు. అనంతరం జరిగిన సమావేశంలో కోలగట్ల వీరభద్ర స్వామి మాట్లాడుతూ సంపాదిస్తున్న కొంత మొత్తంలో సమాజానికి కొంత ఖర్చు చేయాల న్నారు. కరోనా సమయంలో చాంబర్ ఆఫ్ కామర్స్ ప్రతినిధులు అందించిన సేవలు ఎన్నటికీ మర్చిపోలేనివని గుర్తు చేశారు. కార్యక్రమంలో యూత్ వింగ్ అధ్యక్షుడు కార్తీక్, కాపుగంటి ప్రకాష్, ప్రత్యేక ఆహ్వానితులు ఎం.ఆదిశంకర్, రంజిత రెడ్డి, నాగేశ్వరరావు, రాజేష్ పాల్గొన్నారు.
3వ డివిజన్లో గడప గడపకు
నగరంలోని 3వ డివిజన్ పరిధిలోని ఫుల్బాగ్లో జరిగిన గడపగడపకు మన ప్రభుత్వ కార్యక్రమంలో డిప్యూటీ స్పీకర్ కోలగట్ల వీరభద్ర స్వామి పాల్గొన్నారు. ఇంటింటికి వెళ్లి ప్రభుత్వ అందిస్తున్న సంక్షేమ పథకాలను వివరిస్తూ ప్రజాపాలన పట్ల ప్రజాస్పందనను అడిగి తెలుసుకున్నారు. రహదారులో గోతులకు వెంటనే తాత్కాలిక మరమ్మతులు చేయించాలని అధికారులకు ఆదేశించారు. ఫ్లోర్ లీడర్ ఎస్ వి వి రాజేష్, మేయర్ విజయలక్ష్మి, డిప్యూటీ మేయర్ లయా యాదవ్, స్థానిక కార్పొరేటర్ వజ్రపు సత్య గౌరి, వైసిపి నాయకుడు మెండా రమణ, జోనల్ ఇన్చార్జి ముచ్చు శ్రీనివాసరావు, నాలుగో డివిజన్ కార్పొరేటర్ మారోజు శ్రీనివాసరావు పాల్గొన్నారు.
పైడితల్లమ్మ చల్లదనం కార్యక్రమంలో కోలగట్ల
పైడితల్లి అమ్మవారి జాతర ఉత్సవాల్లో భాగంగా స్థానిక లంక వీధిలో నిర్వహించిన చల్లదన కార్యక్రమంలో డిప్యూటీ స్పీకర్ కోలగట్ల వీరభద్ర స్వామి పాల్గొని ప్రత్యేక పూజలు చేశారు. వైసిపి డివిజన్ అధ్యక్షుడు దత్తి అజరు కుమార్ ఆధ్వర్యంలో పైడితల్లమ్మకు చల్లదనం కార్యక్రమాన్ని చేపట్టారు. కార్యక్రమంలో పైడితల్లమ్మ దేవస్థానం ట్రస్ట్ బోర్డు మెంబర్ చల్లా పుష్ప, వైసీపీ నాయకులు ముల్లు త్రినాథ్, దత్తి అజరు కుమార్, స్థానిక కార్పొరేటర్ జకీర్ హుస్సేన్, పల్లి సన్యాసిరావు పాల్గొన్నారు.










