ప్రజాశక్తి- వేపాడ : గడపగడపకు మన ప్రభుత్వం కార్యక్రమంలో జగనన్న ఇళ్ల కోసం వచ్చిన దరఖాస్తులను ఆన్‌లైన్‌ చేయడంలో నిర్లక్ష్యం వహిస్తే సస్పెన్షన్‌ వేటు తప్పదని ఎమ్మెల్యే కడుబండి శ్రీనివాసరావు.. పంచాయతీ కార్యదర్శులను హెచ్చరించారు. గురువారం స్థానిక ఎంపిడిఒ కార్యాలయంలో గృహనిర్మాణాలపై మండల స్థాయి అధికారులు, పంచాయతీ కార్యదర్శులతో సమీక్ష నిర్వహించారు. మండలంలో ఇళ్ల నిర్మాణాల ప్రగతి, ఇంకా తీసుకోవాల్సిన చర్యలపై ఆయన దిశా నిర్దేశం చేశారు. మండలంలో అత్యధికంగా ఇళ్ల నిర్మాణం చేపట్టిన బొద్దాం గ్రామంలో రెండు మూడు రోజుల్లో ప్రారంభోత్సవాలు చేయనున్నట్లు చెప్పారు. అందుకు సంబంధిత అధికారులు సిద్ధంగా ఉండాలని తెలిపారు. కార్యక్రమంలో డిసిసిబి చైర్మన్‌ వివి చినరామునాయుడు, ఎంపిపి డి.సత్యవంతుడు, జెడ్‌పిటిసి ఎస్‌.అప్పలనాయుడు, వైసిపి మండల అధ్యక్షులు ఎం.జగ్గుబాబు, తహశీల్దార్‌ కె.ప్రసన్న కుమార్‌, ఎంపిడిఒ బిఎస్‌కెఎన్‌ పట్నాయక్‌, హౌసింగ్‌ ఎఇ అప్పలనాయుడు, డిప్యూటీ తహశీల్దార్‌ సన్యాసినాయుడు, తదితరులు పాల్గొన్నారు.
వీలుపర్తిలో గడపగడపకు..
మండలంలో వీలుపర్తి గ్రామంలో గడపగడపకు మన ప్రభుత్వం కార్యక్రమాన్ని ఎమ్మెల్యే కడుబండి శ్రీనివాసరావు ఆధ్వర్యాన నిర్వహించారు. ఈ సందర్భంగా ప్రతి గడపకు వెళ్లి సంక్షేమ పథకాలు అందుతున్నవి, లేనివి అడిగి తెలుసుకున్నారు. కార్యక్రమంలో మాజీ సర్పంచ్‌ గోకాడ సత్యంనాయుడు, నాయకులు ఎం.సత్యనారాయణ, మండల సర్పంచుల సంఘం అధ్యక్షుడు ఎన్‌.వెంకట్రావు. పంచాయతీ కార్యదర్శి ధనలక్ష్మి తదితరులు పాల్గొన్నారు.
