ప్రజాశక్తి-నెల్లిమర్ల, విజయనగరంటౌన్‌ : ఈనెల 30, 31తేదీల్లో జరిగే ఉత్తరాంధ్ర ఇలవేల్పు పైడితల్లి అమ్మవారి సినిమానోత్సవానికి కావాల్సిన చింత చెట్టును నెల్లిమర్ల మండలం జరజాపుపేట తుమ్మి అప్పారావు కల్లం నుంచి తరలించే కార్యక్రమం ఆదివారం జరిగింది. సిరిమాను చెట్టుకు ముందుగా సంప్రదాయ బద్దంగా పూజలు నిర్వహించారు. అనంతరం పలువురు ప్రజా ప్రతినిధులు , నేతలు చెట్టు నరికే ప్రక్రియను ప్రారంభించారు. ఈ కార్యక్రమానికి భక్త జనం పోటెత్తింది. ఈ సందర్భంగా అన్న ప్రసాద వితరణ కార్యక్రమాన్ని భారీ ఎత్తున నిర్వహించారు. కార్యక్రమంలో డిప్యూటీ స్పీకర్‌ కోలగట్ల వీరభద్రస్వామి, జెడ్‌పి చైర్మన్‌ మజ్జి శ్రీనివాసరావు, ఎమ్‌పి బెల్లాన చంద్ర శేఖర్‌ , నెల్లిమర్ల ఎమ్మెల్యే బడ్డుకొండ అప్పలనాయుడు, రాష్ట్ర బాలల హక్కుల కమిషన్‌ ఛైర్మెన్‌ కేసలి అప్పారావు, మాజీ మంత్రి పతివాడ నారాయణస్వామి నాయుడు, మాజీ ఎంపి బొత్స ఝాన్సీలక్ష్మి, నెల్లిమర్ల మున్సిపల్‌ ఉపాధ్యక్షులు సముద్రపు రామారావు, ఆలయ ఇఒ సుధారాణి, ప్రధాన పూజారి బంటుపల్లి వెంకట్రావు, ఆలయ కమిటీ సభ్యులు, పలువురు నాయకులు, అధికారులు, ప్రజాప్రతినిధులు, వారి కుటుంబ సభ్యులు పాల్గొన్నారు.
సిరిమానోత్సవానికి విస్తత ఏర్పాట్లు : కోలగట్ల
పైడితల్లి అమ్మవారి సిరిమాను సంబరానికి విస్తత ఏర్పాట్లు చేస్తున్నట్లు డిప్యూటీ స్పీకర్‌ కోలగట్ల వీరభద్రస్వామి చెప్పారు. భక్తులంతా అమ్మవారిని దర్శించుకునే విధంగా క్యు లైన్లు ఏర్పాటు చేశామని, విఐపి పాసులు రద్దు చేశామని తెలిపారు. వివిధ సాంస్కతిక కార్యక్రమాలను ఏర్పాటు చేసినట్లు తెలిపారు.
పైడిమాంబ ఆశీస్సులు అందరికీ ఉండాలి
పైడితల్లి అమ్మవారి ఆశీస్సులు జిల్లా ప్రజలందరికీ ఉండాలని జెడ్‌పి చైర్మన్‌ మజ్జి శ్రీనివాసరావు ఆకాంక్షించారు. అమ్మవారి పండుగకు ఇతర రాష్ట్రాలనుంచి కూడా వేలాది మంది భక్తులు తరలి వస్తారని, అందుకు తగిన ఏర్పాట్లు చేస్తున్నామని తెలిపారు.
