మా శుష్కించే కండలు
మీకు అక్షయ కొండలు
మా ఆకలి కేకలు
మీకు జోల పాటలు
మా కన్నీటి ధారలు
మీకు తేట తేనీయలు
మా చెమట చుక్కలు
మీకు అత్తరు మత్తులు
మా బతుకు గోసలు
మీ ఊపిరి ఉల్లాసాలు
మా నెత్తుటి ధారలు
మీకు సత్తువ దారులు
మా వంగిన ఎముకలు
మీ మేడల పునాదులు
మా బక్కచిక్కిన దేహాలు
మీకు విజయ సోపానాలు
మీరిలాగే
అధికార దాహంతో...
అందినంత దోచి, దాచుకుని
అందనంత ఎత్తుకెదగండి
మా బతుకులకు చితిపేర్చి
చలి మంటలు కాచుకోండి
మా శవాల పునాదులపై
రాజసౌధాలు కట్టుకోండి
మా చావు డప్పు మోతతో
విజయయాత్ర జరుపుకోండి
ఇంకా మారాజులై ఉరేగండి
కానీ ఏదో ఒకరోజు
ప్రజాపోరు పోటెత్తక తప్పదు
మిమ్ముల ముంచెత్తక మానదు
కోడిగూటి తిరుపతి
95739 29493
