ప్రజాశక్తి-విజయనగరం : జిల్లాలోని సహకార వ్యవస్థను బలోపేతం చేసేందుకు ప్రభుత్వ శాఖలు కృషి చేయాలని జిల్లా కలెక్టర్‌ నాగలక్ష్మి కోరారు. జిల్లా సహకార అభివృద్ధి కమిటీ (డిసిడిసి), జిల్లా స్థాయి అమలు కమిటీ , పిఎసిఎస్‌ కంప్యూటరైజేషన్‌ అమలు, మోనటరింగ్‌ కమిటీ మంగళవారం కలెక్టరేట్‌లో వరుసగా జరిగాయి. సమావేశాల్లో కలెక్టర్‌ నాగలక్ష్మి మాట్లాడుతూ, సహకార సంఘాలను బలోపేతం చేసి, వాటి ఆదాయాన్ని పెంచేందుకు చర్యలు తీసుకోవాలని కోరారు. కొన్ని సంఘాల కార్యకలాపాలు నామమాత్రంగా ఉన్నాయని, ప్రస్తుతం అందుబాటులో ఉన్న ఆధునిక సౌకర్యాలను వినియోగించుకొని వాటి పరిధిని, కార్యకలాపాలను పెంచాలని సూచించారు. వివిధ ప్రభుత్వ శాఖల పరిధిలో ఏర్పాటైన సహకార సంఘాల కార్యకలాపాలపై ఆరా తీశారు. సహకార సంఘాల కంప్యూటరైజేషన్‌ ప్రక్రియను త్వరగా పూర్తి చేయాలని, పెండింగ్‌లో ఉన్న బిసి వెల్ఫేర్‌, పశు సంవర్థకశాఖ పరిధిలోని సంఘాల కంప్యూటర్‌ ప్రక్రియను కూడా వెంటనే పూర్తి చేయాలని చెప్పారు. గోదాముల నిర్మాణంపై దృష్టి పెట్టి త్వరగా పూర్తి చేయాలని కలెక్టర్‌ ఆదేశించారు.
జిల్లా సహకార అధికారి పి.రమేష్‌ మాట్లాడుతూ, ఈ మూడు కమిటీల కార్యకలాపాలను, ఆయా కమిటీల్లోని సభ్యుల పాత్రను వివరించారు. కంప్యూటరైజేషన్‌ ప్రక్రియ దాదాపు పూర్తి అయ్యిందని తెలిపారు. సమావేశంలో జాయింట్‌ కలెక్టర్‌ కె.మయూర్‌ అశోక్‌, ట్రైనీ కలెక్టర్‌ వెంకట త్రివినాగ్‌, డిపిఒ నిర్మలాదేవి, జిల్లా వ్యవసాయాధికారి తారకరామారావు, ఉద్యాన శాఖాధికారి జమదగ్ని, పశు సంవర్ధకశాఖ డిడి వైవి రమణ, మత్స్యశాఖ డిడి నిర్మలా కుమారి, మత్స్యకార ఫెడరేషన్‌ ప్రతినిధి బర్రి చిన్నప్పన్న, నాబార్డ్‌ డిడిఎం నాగార్జున, సివిల్‌ సప్లయిస్‌ డిఎం మీనాకుమారి, డిసిఎంఎస్‌ మేనేజర్‌ రమేష్‌, డిసిసిబి సిఇఒ, ఇంజినీరింగ్‌ అధికారులు పాల్గొన్నారు.
