ప్రజాశక్తి - విజయనగరం ప్రతినిధి : ఏడాదిగా ఇదిగో అదిగో అంటూ చెప్పుకొచ్చిన ప్రభుత్వం ఎట్టకేలకు ఈనెల 12న సామూహిక గృహ ప్రవేశాలు చేపట్టింది. ఈ సందర్భంగా ప్రభుత్వం అందించే సాయంపై అధికార పార్టీకి చెందిన ప్రజాప్రతినిధులు, అధికారులు ఒకరినొకరు మించిపోయేలా ప్రసంగించారు. ప్రభుత్వ సాయాన్ని ఆకాశానికెత్తేశారు. ఆ మాటకొస్తే బొబ్బిలిలో గృహప్రవేశాల సందర్భంగా కొందరు లబ్ధిదారులు కూడా తమ సొంతింటి కల నెరవేరిందంటూ స్పందించారు. ఈ ప్రచారానికి మించి ఇళ్ల నిర్మాణానికి ప్రభుత్వం ఇస్తున్న మొత్తం ఎంత? ఇసుక, సిమెంట్‌, ఇటుక, కూలి రేట్లు, మొత్తంగా చిన్నపాటి ఇల్లు కట్టుకోవడానికి అవుతున్న మొత్తం ఎంత? అన్నదానిపై జిల్లాలో ముమ్మరంగా చర్చసాగుతోంది. ఇల్లు కట్టి చూడు అంటారు పెద్దలు. అందుకు తగ్గట్టే గృహ నిర్మాణ సామగ్రి ధరలు ఆశాకాన్ని అంటాయి. ఇనుము టన్ను ధర రూ.60వేలు పలుకుతోంది. ఇక ఇసుక రాజకీయ నాయకులు, ప్రజాప్రతినిధులకు తప్ప దొరికే పరిస్థితి లేదు. ఇటువంటి పరిస్థితుల్లో ట్రాక్టర్‌ ఇసుకకు రూ.6వేలు నుంచి రూ.7వేలు వరకు వెచ్చించాల్సివస్తోంది. కూలీల రేట్లు రూ.600 నుంచి రూ.1000 వరకు ఉన్నాయి. ఇటువంటి పరిస్థితుల్లో సర్కారువారు ఇస్తున్న రూ.1,80,000 ఏమేరకు సరిపోతుందో అంటూ లబ్ధిదారుల్లో ఎక్కువ మంది వాదన. అందువల్లే ఇప్పటివరకు జిల్లా వ్యాప్తంగా మంజూరైన 78,127 ఇళ్లకుగాను 3,994 ఇళ్ల నిర్మాణాలు ప్రారంభానికి నోచుకోలేదు. పునాదుల తవ్వకాలు, నిర్మాణదశలో 18,819 ఇళ్లు ఉన్నాయి. 13,509 ఇళ్ల మాత్రమే పూనాదుల దశలో నిలిచిపోయాయి. కేవలం 36,506 ఇళ్లు పూర్తయ్యాయినట్టు అధికారిక లెక్కలు స్పష్టం చేస్తున్నాయి. ఇంటి పైకప్పువేసే దశలో 3,811 ఇళ్లు, ఇంటిపైకప్పు వేసినవి 1,488 ఉన్నాయి. ప్రభుత్వం చెబుతున్నట్టుగా వారికి అందుతున్న సాయం సరిపోతే ఇన్ని ఇళ్ల నిర్మాణాలు ఎందుకు వెనుకబడ్డాయన్నది ప్రజాప్రతినిధులు, అధికారులే చెప్పాల్సివుంది. ఇంకా చెప్పాలంటే గ్రామీణ ప్రాంతాల్లోనూ, ముఖ్యంగా సొంత స్థలాల్లో నిర్మించుకున్న ఇళ్లే ఎక్కువ ఉన్నాయి. తమ ఇళ్ల నిర్మాణాల వెనుక ఆస్తుల విక్రయాలు, అప్పులు ఉన్నాయన్న విషయం ప్రభుత్వం గుర్తుపెట్టుకోవాలని పలువురు లబ్థిదారులు వాపోతున్నారు. ప్రభుత్వం మంజూరు చేసిన జగనన్న కాలనీల్లో చాలా వరకు ఇళ్ల నిర్మాణాలు చేపట్టకపోవడం, నిర్మాణాలు వివిధ దశల్లో నిలిచిపోవడం వంటి పరిస్థితి కనిపిస్తోంది. ముఖ్యంగా రాష్ట్రంలోనే అతిపెద్ద లేఅవుట్‌గా ప్రభుత్వం భావిస్తున్న గుంకలాం లేఅవుట్‌లో నిర్మాణాలు నత్తనడకన సాగుతున్నాయి. ఈ లేఅవుట్‌లో సుమారు 11వేల ఇళ్ల స్థలాలకు గాను 10,154 ఇళ్లను ప్రభుత్వం మంజూరు చేసింది. వీటిలో లబ్ధిదారులు సొంతంగా నిర్మించుకోవడం, ప్రభుత్వం తరపున ఇసుక, సిమెంట్‌, ఐరెన్‌ వంటి నిర్మాణ సామగ్రిని పంపిణీ చేయడం, పూర్తిగా ప్రభుత్వమే నిర్మించి లబ్ధిదారులకు అప్పగించి ఇవ్వడం వంటి మూడు పద్ధతుల్లో ఇక్కడ నిర్మాణ పనులు జరుగుతున్నాయి.
ఇప్పటి వరకు ఈ లేఅవుట్‌లో కేవలం 352 ఇళ్లు మాత్రమే పూర్తికావడం గమనార్హం. 114 ఇళ్ల నిర్మాణ పనులు నేటికీ ప్రారంభానికి నోచుకోలేదు. ఇక్కడ మంజూరైన మొత్తం ఇళ్లలో సుమారు 8వేల వరకు ప్రభుత్వమే నిర్మించి ఇవ్వాల్సివుంది. సుమారు 3వేల ఇళ్ల నిర్మాణాలు ప్రారంభించలేదు. మిగిలిన ఐదు వేల ఇళ్లు కూడా స్థలాల్లో పునాదులు మాత్రమే పడ్డాయి. కేంద్ర ప్రభుత్వం నుంచి రావాల్సిన బిల్లులు పడకపోవడంతో సుమారు ఏడాది క్రితమే సంబంధిత కాంట్రాక్టర్‌ పనులు నిలిపివేశాడు. తాజాగా నిధుల సమస్య లేదని అధికారులు చెబుతున్నారు. పనులు కూడా ప్రారంభమైనప్పటికీ అంత చురుకుగా సాగడం లేదు. గతంలో ఇక్కడ ఇళ్ల నిర్మాణ పనులకు కాంట్రాక్టర్‌ వద్ద రోజూ సుమారు 500 నుంచి 600మంది పనిచేసేవారు. ప్రస్తుతం 100మందికి మించి కనిపించడం లేదు. దీంతో, పనులు అత్యంత మందకొడిగా సాగుతున్నాయి. ఇన్ని సమస్యలు ఉన్నప్పటికీ ఇళ్ల నిర్మాణాలు శరవేగంగా సాగిపోతున్నాయని, లబ్ధిదారులంతా సుభిక్షంగా ఉన్నారని చెప్పుకోవడం పట్ల జనం ఆశ్చర్యం వ్యక్తం చేస్తున్నారు.
