ప్రజాశక్తి-విజయనగరం టౌన్‌ : ప్రజల్లో సాను భూతి పొందాలనే చంద్రబాబు ఆరోగ్యంపై టిడిపి నాయకులు డ్రామాలు ఆడుతున్నారని వైసిపి జిల్లా అధ్యక్షులు మజ్జి శ్రీనివాసరావు అన్నారు. శనివారం జిల్లా పరిషత్‌ సమావేశ మందిరంలో ఏర్పాటు చేసిన విలేకర్ల సమావేశంలో ఆయన మాట్లాడారు. చంద్రబాబు ఆరోగ్యంపై టిడిపి నాయకులు చేస్తున్న వ్యాఖ్యలు పూర్తిగా అవాస్తవమని అన్నారు. జైలుశాఖ డిఐజి చంద్రబాబు నాయుడు రిమాండ్‌ మొదటి రోజు నుంచి నేటి వరకు హెల్త్‌ బుల్లెట్‌ విడుదల చేశారని.. కానీ టిడిపి శ్రేణులు ప్రజలను తప్పుతోవ పట్టించి సానుభూతి పొందేందుకు ప్రయత్నిస్తున్నారని అన్నారు. చంద్రబాబు నాయుడు ఒక్కరి ఆరోగ్యమే కాకుండా రాష్ట్రంలో ప్రజలందరి ఆరోగ్యంపై ముఖ్యమంత్రి జగన్మోహన్‌ రెడ్డి ప్రత్యేక శ్రద్ధ తీసుకొని ప్రతి గడపకు వైద్యులను పంపించి జగనన్న ఆరోగ్య సురక్ష వంటి కార్యక్రమాలు నిర్వహిస్తున్నారని తెలిపారు. చంద్రబాబు అరెస్టు పూర్తిగా చట్టపరంగా జరిగిందని అన్నారు. సమావేశంలో రాజాం ఎమ్మెల్యే కంబాల జోగులు, ఎమ్మెల్సీ ఇందుకూరి రఘురాజు పాల్గొన్నారు.
