ప్రజాశక్తి-విజయనగరం : యువత దేశ రక్షణ రంగంలో భాగస్వామ్యం అయ్యేలా, వారు ఆర్మీలో చేరేందుకు అన్ని విధాలుగా సంసిద్ధులుగా తయారు చేయిస్తున్న ఇండియన్‌ ఆర్మీ కాలింగ్‌ డైరెక్టర్‌ బి.వి రమణ సేవలు ఎందరికో స్ఫూర్తిదాయకమని పోలీసు ట్రైనింగ్‌ కళాశాల ప్రిన్సిపల్‌ ఎస్‌పిటి ఆనందబాబు కొనియాడారు. మాజీ రాష్ట్రపతి, భారతరత్న డాక్టర్‌ ఎపిజె అబ్దుల్‌ కలామ్‌ జయంతిని పురస్కరించుకొని మాతృదేవోభవ స్వచ్ఛంద సంస్థ, ఎన్‌విఎన్‌ బ్లడ్‌బ్యాంకు ఆధ్వర్యంలో ఆదివారం రక్తదాన శిబిరం నిర్వహించారు. ఈ సందర్భంగా ఇటీవల విడుదల అయిన అగ్నిపథ్‌ ఫలితాల్లో ఇండియన్‌ ఆర్మీ కాలింగ్‌ సంస్థకు చెందిన 82 మంది ఎంపిక కావడంతో వారికి శిక్షణ అందించిన రమణను సత్కరించారు. దేశం పట్ల ప్రేమ అభిమానాలతో చిన్నవయసులో ఎందరో యువతలో దేశభక్తిని రగిలించి వారు ఇండియన్‌ ఆర్మీ వైపు వెళ్లేలా కృషి చేస్తున్న బి.వి రమణ సేవలు శ్లేఘనీయమని కొనియాడారు. విజయనగరం సైనిక్‌ వెల్ఫేర్‌ ఆఫీసర్‌ మజ్జి కృష్ణారావు, లోక్‌సత్తా రాష్ట్ర అధ్యక్షులు బీశెట్టి బాబ్జి, మాజీ ఎన్‌ఎస్‌జి అనీల్‌ తదితరులు ఆయన్ను అభినందించారు.
