ప్రజాశక్తి - నెల్లిమర్ల : రాష్ట్ర స్థాయి క్రీడా పోటీల్లో స్థానిక ప్రభుత్వ ఉన్నత పాఠశాల విద్యార్థులు ప్రతిభ కనబర్చారు. గురువారం ఆంధ్రప్రదేశ్‌ స్కూల్‌ గేమ్స్‌ ఫెడరేషన్‌ ఆధ్వర్యంలో కర్నూలు జిల్లా ఎమ్మిగనూరులో జరిగిన అండర్‌-17 ఫుట్‌ బాల్‌ పోటీల్లో పదో తరగతి విద్యార్థి వి హరిబాబు జట్టు రన్నర్‌గా నిలిచింది. తిరుపతిలో శ్రీనివాస స్పోర్ట్స్‌ కాంప్లెక్స్‌లో జరిగిన అండర్‌-19 ఈత పోటీల్లో పాఠశాలకు చెందిన జి.సంతోష్‌, ఎన్‌.కుమార్‌, యు.చరణ్‌, వై.మణికంఠ, కె.అజరు కుమార్‌, టి.రమణ, ఎస్‌.పవన్‌ కుమార్‌ పాల్గొని సత్తా చాటారు. త్రోబాల్‌ అండర్‌-19 విభాగంలో ఎన్‌.పూర్ణచంద్ర రెడ్డి, ఫుట్‌ బాల్‌ అండర్‌-14 విభాగంలో ఎం.హర్షవర్ధన్‌ నాయుడు కూడా రాష్ట్రస్థాయి పోటీలకు ఎంపికయ్యారు. వీరిని పాఠశాల హెచ్‌ఎం సిహెచ్‌.ఆనందమూర్తి, వ్యాయామ ఉపాధ్యాయిని ప్రమీల పాత్రో, ఇతర ఉపాధ్యాయులు అభినందించారు.
గురుకుల పాఠశాల విద్యార్థుల క్రీడా పగ్రతి
వేపాడ: స్థానిక గురుకుల పాఠశాల విద్యార్థులు అథ్లెటిక్స్‌ పోటీల్లో ప్రతిభ కనబరిచారు. ఇటీవల జిల్లా కేంద్రంలోని రాజీవ్‌ స్టేడియంలో జరిగిన అండర్‌ -19 అథ్లెటిక్స్‌లో గురు కుల పాఠశాల విద్యార్థులు విజయ కేతనం ఎగరవేశారు. పాఠ శాల విదార్థులు నీహారిక 3 కిలోమీటర్ల పరుగులో మొదటి బహుమతి సాధించగా, కీర్తి 3 కిలోమీటర్ల వాక్‌ రేస్‌లో మొదటి బహుమతి, శిరీష జావిలన్‌ త్రోలో మొదటి బహు మతి సాధించగా, జానకి డిస్కో త్రో లో మొదటి బహుమతి సాధించారని పాఠశాల ప్రిన్సిపల్‌ ఫ్లోరెన్స్‌ తెలిపారు. తమ పాఠశాల విద్యార్థులు జిల్లా స్థాయి నుండి రాష్ట్ర స్థాయికి ఎంపికవడం చాలా సంతోషంగా ఉందని, వీరికి శిక్షణ ఇచ్చిన పిఇటి అరుణ, పీడీ ఆదిలక్ష్మినీ ఆమె గురువారం అభినందించారు.
డెంకాడ: మండలంలోని అక్కివరం మోడల్‌ స్కూల్‌ విద్యార్థులు ఇటీవల పిఠాపురంలో జరిగిన రాష్ట్ర స్థాయి సాఫ్ట్‌ టెన్నిస్‌ పోటీల్లో ప్రతిభ కనబరిచారు. బూర్లి మనోజ్‌కుమార్‌, మామిడి గుణసందీప్‌ పాల్గొని ద్వితీయ స్థానం దక్కించుకున్నారు. ఈ సందర్భంగా విద్యార్థులకు తర్ఫీదు ఇచ్చిన పీడీ ఎన్‌ వరహాలను, విద్యార్థులను ప్రిన్సిపల్‌ సంధ్యారాణి గురువారం అభినందించారు.
