ప్రజాశక్తి -విజయనగరం కోట : రాష్ట్రంలో రాజ్యాంగం అమలులో ఉందా అని తెలుగుదేశం పార్టీ పాలిట్‌బ్యూరో సభ్యులు పూసపాటి అశోక్‌ గజపతిరాజు ప్రశ్నించారు. బుధవారం సాయంత్రం కోట జంక్షన్‌ వద్ద వాజీ ఛానల్‌ ఎమ్‌డి గణపతినీడి శ్రీనివాసరావు ఆధ్వర్యంలో 'నీ కోసం దీక్షబూని సాగుతాం చంద్రన్నా' పేరిట జరిగిన కార్యక్రమంలో అశోక్‌ గజపతిరాజు పాల్గొని గాంధీ బొమ్మకు, ఎన్‌టిఆర్‌ విగ్రహానికి పూలమాల వేసి ఘనంగా నివాళులర్పించారు. ఈ సందర్భంగా ఆయన మాట్లాడుతూ ఈ రాష్ట్రంలో ప్రశ్నిస్తే ఎవరినైనా జైల్లో పెడుతున్నారని, విచారణ మాత్రం వారికి నచ్చిప్పుడు చేస్తున్నారని అన్నారు. గణపతినీడి శ్రీనివాసరావు మాట్లాడుతూ రాష్ట్రాన్ని సుదీర్ఘకాలంపాటు అభివద్ధి పథంలో నడిపించిన చంద్రబాబును 40 రోజులుగా జైలులో పెట్టడం అమానుషమని అన్నారు. టిడిపి జిల్లా అధ్యక్ష కార్యదర్శులు కిమిడి నాగార్జున, ఐవిపి రాజులు మాట్లాడుతూ రాష్ట్రంలో అభివృద్ధి పరిపాలన జరగడం లేదని, రాష్ట్రం అధోగతి పాలైందని అన్నారు.
అంతకుముందు నగరంలోని పిడబ్ల్యు మార్కెట్‌లో 'బాబుతో నేను' కార్యక్రమంలో భాగంగా వర్తకులకు, కొనుగోలుదారులకు కరపత్రాలను అశోక్‌గజపతిరాజు పంచిపెట్టారు. చంద్రబాబు అక్రమ అరెస్టుకు నిరసనగా, ఆయనకు మద్దతుగా ఒక మిస్డ్‌ కాల్‌ ఇవ్వాలని కోరారు. ప్రజల ప్రాథమిక హక్కులను రాష్ట్ర ప్రభుత్వం హరిస్తుందన్నారు. టిడిపి ప్రజల పక్షాన నిలబడిన పార్టీ అని, అందుకే ప్రజలంతా మద్దతు తెలపాలని అన్నారు. కార్యక్రమంలో ఎచ్చెర్ల నియోజకవర్గ నాయకులు కలిశెట్టి అప్పల నాయుడు, మండల పార్టీ అధ్యక్షులు బొద్దల నర్సింగరావు, కార్యదర్శి కె.పోలినాయుడు, నగర అధ్యక్షులు ప్రసాదుల లక్ష్మీవరప్రసాద్‌, కార్యదర్శి బంగారుబాబు, జిల్లా కార్యాలయ కార్యదర్శి రాజేష్‌ బాబు, కనకల మురళీమోహన్‌, వి. శ్రీనివాసరావు, విజ్జపు ప్రసాద్‌ తదితరులు పాల్గొన్నారు.
