- జరజాపుపేటలో సినిమాను చెట్టుకు పూజలు చేసిన ఉప సభాపతి కోలగట్ల
ప్రజాశక్తి-విజయనగరం టౌన్ : విజయనగరం ప్రజల ఆరాధ్య దైవం శ్రీ పైడితల్లి అమ్మవారి చల్లని దీవెనలు ప్రజలందరిపైనా ఉండాలని ఏపీ శాసనసభ ఉపసభాపతి కోలగట్ల వీరభద్రస్వామి ఆకాంక్షించారు. నెలిమర్లలోని జరజాపుపేట గ్రామ కల్లాలు వద్ద సాక్షాత్కరించిన పైడితల్లి అమ్మవారి సినిమాను చెట్టు తరలింపు ప్రక్రియ ఆదివారం ఉదయం అమ్మ నామస్మరణ, జయజయధ్వానాల నడుమ సంప్రదాయబద్ధంగా జరిగింది. కార్యక్రమంలో పాల్గొన్న కోలగట్ల.. సిరిమాను చెట్టుకు పూజలు చేసిన అనంతరం గొడ్డలితో వేటు వేశారు. తొలుత జరజాపు పేట గ్రామ పెద్దలు, పైడిమాంబ దేవస్థానం అధికారులు ఆయనకు సాదర స్వాగతం పలికారు. అనంతరం కోలగట్ల మీడియాతో మాట్లాడుతూ.. జరజాపుపేట గ్రామంలో చల్లని తల్లి సిరిమాను చెట్టు సాక్షాత్కరించడం ఇక్కడి ప్రజలు చేసుకున్న అదృష్టమని చెప్పారు. ఈ రోజున ఇక్కడ సుమారు 25 వేల మంది భక్తులకు అన్న ప్రసాదం ఏర్పాటు చేసేందుకు చర్యలు తీసుకున్నామన్నారు. ఈ నెల 30, 31వ తేదీల్లో జరగనున్న జాతర మహోత్సవాన్ని పెద్దలు మంత్రి బొత్స సత్యనారాయణ ఆధ్వర్యంలో, జిల్లా యంత్రాంగం సహకారంతో ఘనంగా నిర్వహించేందుకు అన్ని ఏర్పాట్లూ చేశామన్నారు. భక్తులకు ఇబ్బందులు లేకుండా, సులువుగా తల్లి దర్శనం చేసుకునేలా చర్యలు తీసుకుంటున్నామన్నారు. పూర్తిగా వీఐపీ పాసులను రద్దు చేసినట్లు చెప్పారు. జాతర రోజుల్లో వివిధ సాంస్కృతిక కార్యక్రమాలు నిర్వహిస్తున్నామన్నారు. ఆయన వెంట నగరంలోని వివిధ డివిజన్ల కార్పొరేటర్లు, సీనియర్ నాయకులు, జరజాపుపేట గ్రామ పెద్దలు, దేవస్థానం అధికారులు ఉన్నారు.
